ԵՐԵՎԱՆ, 22 փետրվարի - Sputnik. Ստեփանակերտում շմոլ գազից երկու մարդ է թունավորվել, որոնցից մեկը 2 տարեկան երեխա է։ Տեղեկությունը հայտնում է Արցախի ոստիկանությունը։
Նշվում է, որ փետրվարի 21-ին «Արևիկ» մանկական բուժմիավորումից և «Հանրապետական բժշկական կենտրոն» ՓԲԸ-ից հաղորդումներ են ստացվել ոստիկանության Ստեփանակերտ քաղաքի վարչություն այն մասին, որ նույն օրը շմոլ գազի թունավորումով իրենց մոտ են ընդունվել մայրաքաղաքի բնակիչներ՝ 2019թ. ծնված Ա. Ա.-ն և 1999թ. ծնված Ա. Գ.-ն։
«Ստուգմամբ պարզվել է, որ նշված անձինք շմոլ գազից թունավորվել են նույն օրը ժամը 01:30-ի սահմաններում, իրենց բնակարանի բաղնիքում լոգանք ընդունելու ժամանակ, խոհանոցում տեղադրված գազի ջրատաքացուցիչ կաթսայից արտանետված շմոլ գազից»,– նշված է հաղորդագրության մեջ:
Նշանակվել է դատաբժշկական փորձաքննություն: Ստուգմամբ զբաղվում է ոստիկանության Ստեփանակերտ քաղաքի վարչությունը: