ԵՐԵՎԱՆ, 19 փետրվարի - Sputnik. Ադրբեջանագետ Անժելա Էլիբեգովան վստահեցնում է` գաղափար չունի, թե ինչու են իրեն ԱԱԾ տարել։ Այդ մասին լրավրողներին տեղեկացրեց ինքը՝ Էլիբեգովան՝ ԱԱԾ–ից դուրս գալուց հետո։
«Առգրավել են իմ հեռախոսն ու աշխատանքային համակարգիչը, որի մեջ կարևոր ինֆորմացիա կա` այդ թվում Ադրբեջանի գործողությունների մասին»,–ասաց նա։
Պառլամենտարիզմի զարգացման միջազգային կենտրոնի գործադիր տնօրեն, իրավագետ Գոհար Մելոյանն էլ իր հերթին հայտնեց, որ աշխատասենյակ է մտել (նույն վայրը, ուր Էլիբեգովան է եղել - խմբ.), երբ քննչական գործողություններ էին կատարվում։ Նրա խոսքով, թույլ չեն տվել ծանոթանալ, թե ինչ գործի շրջանակներում են իրենց աշխատասենյակը խուզարկում։
«Կասկածյալի հիմքով ենք հարցաքննվել, սակայն մեր կարգավիճակի հարցն անհասկանալի է մեզ համար։ Հրաժարվել ենք ցուցմունք տալ, և ազատ արձակվեցինք»,–ասաց Մելոյանը։
Նա հավելեց, որ թաքցնելու ոչինչ չունեն, և այս ամենն ուղղակի զավեշտ է։
Նշենք, որ խուզարկել են Պառլամենտարիզմի զարգացման միջազգային կենտրոնի գրասենյակը, որտեղ Էլիբեգովան փորձագետ է։
Կարեն Բեքարյանն ԱԱԾ–ում է, նրան հարցաքննում են. ի՞նչ են առգրավել տնից
Հիշեցնենք, որ այսօր ԱԱԾ բերման էր ենթարկվել նաև ԱԺ աշխատակազմի նախկին ղեկավար-գլխավոր քարտուղար Արա Սաղաթելյանը և «Քառյակ մեդիայի» համահիմնադիր, վերլուծաբան Կարեն Բեքարյանը։
Հավելենք, որ վաղը նախատեսված է ընդդիմության համապետական հանրահավաքը։