Նարինե Ղալումյանի խոսքով` կլիմայական կտրուկ փոփոխությունների պարագայում գրանցվում է հատկապես սրտանոթային և պաթոլոգիկ հիվանդությունների աճ, ուստի անհրաժեշտ է, որ մարդիկ ավելի շատ խմեն հանգստացնող թուրմեր, կարճատև ազդող հիպոտենզիվներ, որպեսզի երեք-չորս ժամվա ընթացքում հնարավոր լինի կարգավորել ճնշումը։
Ըստ նրա` կտրուկ փոփոխությունները կարող են հանգեցնել ճնշման տատանումների նույնիսկ այն մարդկանց մոտ, որոնք ճնշման հետ կապված խնդիր չունեն։
«Ես այսօր ընդունել եմ ճնշման գանգատներով պացիենտների, որոնք նախկինում չեն ունեցել ֆիզիկական կամ հոգեբանական լարվածություն։ Այդուհանդերձ նրանց նույնպես խորհուրդ տվեցի հանգստացնող թուրմեր խմել։ Դրանք էսկարդներն են, սեդամինները։ Ճնշման իջեցումների վրա ամենանուրբը, ամենաանվտանգն ու ամենաանվնասն ազդում են կապտոպրիլները»,– Sputnik Արմենիային ասաց թերապևտը։
Ղալումյանը խորհուրդ է տալիս անհրաժեշտության դեպքում չորս ժամը մեկ ընդունել 25 միլիգրամանոց կապտոպրիլ և սահմանափակել աղի օգտագործումը։
Ի՞նչ է «լուռ» կաթվածը․ բժիշկը խոսել է հիմնական ախտանիշների մասին
Անդրադառնալով երկու օր առաջ տեղի ունեցած երկրաշարժին և այն հարցին, թե այդ երևույթը, մագնիսական դաշտի ակտիվության հետ համադրվելով, ինչ ազդեցություն կարող է ունենալ մարդու օրգանիզմի վրա, թերապևտն ընդգծեց, որ երկրաշարժերը որոշ չափով անկանխատեսելի են, և մարդիկ սովորաբար այդ պահին լավ չեն զգում, ունենում են սրտխառնոց, գլխացավ, շշմածություն, տրամադրության անկում` ներկայացնելով ընդհանուր կոնստիտուցիոնալ գանգատներ։
«Մագնիսական դաշտերը խաթարում են մարդու ադապտացիոն հատկությունները։ Նման դեպքերում նույնպես խորհուրդ է տրվում ընդունել հանգստացնող թուրմեր, որոնց մեջ մեզ շատ հայտնի են վալերիանան, ալոճը, սակայն նման դեպքերում կարող են օգտակար լինել փոքր չափաքանակով, մեկ բաժակ ջրին մեկ թեյի գդալի չափով լիկյորը, վիսկին ու կոնյակը»,– նշեց թերապևտը։
Ղալումյանի կարծիքով`վերը նշված միջոցները կհանգստացնեն օրգանիզմը։