ԵՐԵՎԱՆ, 14 փետրվարի – Sputnik. Իրանի ու Ռուսաստանի ռազմածովային զորավարժություններն ուղղված են Հնդկական օվկիանոսի հյուսիսային հատվածի անվտանգության պահպանմանը։ Այս մասին, ՌԻԱ Նովոստիի փոխանցմամբ, հայտարարել է Իրանի բանակի հրամանատարի տեղակալ Հաբիբուլահ Սայարին։
«Այս զորավարժությունները երկրի հարավում կլինեն Իրանի և Ռուսաստանի երկրորդ զորավարժությունները, որոնց նպատակը Հնդկական օվկիանոսի հյուսիսային մասի անվտանգությունը պահպանելն է», – ըստ Իրանի բանակի կայքում տեղադրված հայտարարության՝ նշել է Սայարին։
Իրանի բանակի ռազմածովային ուժերի ու Իսլամական հեղափոխության պահապանների կորպուսի հետ Ռուսաստանի հզոր ռազմածովային նավատորմի զորավարժությունների անցկացումը հստակ ուղերձ է պարունակում, հավելել է նա, նշելով, որ իրանական նավատորմը խոշոր ծովային տերությունների մակարդակի է։
Միևնույն ժամանակ զինվորականը չի նշել զորավարժությունների անցկացման ժամանակահատվածը։
Ավելի վաղ Իրանում Ռուսաստանի դեսպան Լևան Ջագարյանը ՌԻԱ Նովոստիին հայտնել էր Հնդկական օվկիանոսում փետրվարի կեսերին բազմակողմանի ռազմածովային զորավարժությունների անցկացման ծրագրերի մասին։ Դրանց ընթացքում նախատեսվում է, այդ թվում, փոխգործակցություն մշակել որոնողափրկարարական գործողությունների և նավագնացության անվտանգությունն ապահովելու միջոցառումների անցկացման ժամանակ։