ԵՐԵՎԱՆ, 10 փետրվարի - Sputnik. 2020թ․պատերազմի ընթացքում վիրավորում ստացած անձանց տրվող միանվագ 500,000 դրամ աջակցության ծրագրի դիմումներն արդեն ընդունվում են։ Տեղեկությունը հայտնում են ՀՀ աշխատանքի և սոցիալական հարցերի նախարարությունից։
«Աջակցությունը տրվում է ռազմական գործողությունների հետևանքով վիրավորում ստացած այն անձանց, որոնք բուժհաստատություններում բժշկական օգնություն և սպասարկում են ստացել, չունեն հաշմանդամության խումբ կամ ունեն (կարող են ունենալ) հաշմանդամության երրորդ խումբ»,–ասված է հաղորդագրության մեջ:
Դիմումներն ընդունվում են էլեկտրոնային եղանակով մինչև ապրիլի 15-ը՝ օոliոe.ssa.am կայքի «Արցախում վիրավորում ստացած անձանց աջակցության դիմում» բաժնում (այստեղ՝ https://bit.ly/2ZfPEkR)։
Դիմումը լրացնելիս շահառուն պետք է մուտքագրի անունը, ազգանունը, անձը հաստատող փաստաթղթի սերիան ու համարը (անձնագիր կամ նույնականացման քարտ), հետադարձ կապի էլեկտրոնային փոստի հասցեն, բջջային հեռախոսահամարը և իր բանկային հաշվին կցված վճարային քարտի համարը։
Գումարը կփոխանցվի շահառուի քարտային հաշվին։
Արցախյան պատերազմում տուժածներն ու նրանց հարազատները հոգեբանական աջակցություն կստանան
Դիմումի հաստատման կամ մերժման մասին Սոցիալական ապահովության ծառայությունը էլեկտրոնային հաղորդագրություն կուղարկի դիմողի հետադարձ կապի էլեկտրոնային փոստի հասցեին։