ԵՐԵՎԱՆ, 9 փետրվարի – Sputnik. ՀՀ երկրորդ նախագահ Ռոբերտ Քոչարյանի և մյուսների գործով դատական նիստի ժամանակ գործով մեղադրյալ Յուրի Խաչատուրովի պաշտպան Միհրան Պողոսյանը միջնորդություն ներկայացրեց Խաչատուրովի խափանման միջոցը վերացնելու վերաբերյալ։
Նշենք, որ դեռ 2018-ին Խաչատուրովի հանդեպ ընտրված խափանման միջոց կալանքը փոխարինվեց 5 մլն դրամ գրավով ազատ արձակելով։
«Երևանի ընդհանուր իրավասության դատարանի դեռ 2018-ի հուլիսի 27-ի որոշման մեջ նշված է, որ ներկայացված նյութերով չի արձանագրվել Խաչատուրովի առնչությունը 300.1 հոդվածով (Սահմանադրական կարգը տապալելը) առաջադրված մեղադրանքին։ Բացի այդ, Վերաքննիչ քրեական դատարանում էլ հաստատվել էր, որ գործի հանգամանքներն առանձին անձանց վերաբերյալ այլ են, և Խաչատուրովի` ենթադրյալ կատարած արարքը վտանգավորության աստիճանով նույնական չէ գործով անցնող այլ անձանց հետ»,–ասաց Պողոսյանը։
Նա հիշեցրեց` Խաչատուրովը նույնիսկ մեկ դատական նիստից չի բացակայել, ավելին, այս ընթացքում նրա խափանման միջոցի հարց չի բարձրացվել։ Ուստի, Պողոսյանը գտնում է, որ Խաչատուրովի` այս ողջ ժամանակահատվածում դրսևորած իրավաչափ վարքագիծը կարող է ապահովվել առհասարակ խափանման միջոցի բացակայության պայմանում։
Դատավոր Աննա Դանիբեկյանը հեռացավ խորհրդակցական սենյակ` որոշում կայացնելու։ Որոշման մասին հայտնի կլինի փետրվարի 11-ին, ժամը 12։00-ին կայանալիք դատական նիստի ժամանակ։
Այսօր ընթացող դատական նիստին Աննա Դանիբեկյանը թույլատրեց ՀՀ երկրորդ նախագահ Ռոբերտ Քոչարյանի կալանադրված գույքի հետ կնքել ցանկացած պայմանագիր, բացի օտարումից։
Հիշեցնենք, որ այս գործով անցնում են ՀՀ երկրորդ նախագահ Ռոբերտ Քոչարյանը, Սեյրան Օհանյանը, Արմեն Գևորգյանը և Յուրի Խաչատուրովը։
ՀՀ երկրորդ նախագահը մասնակցում է 2008 թվականի մարտի 1-ի դեպքերի վերաբերյալ քրեական գործի դատաքննությանը: Նրա դեմ քրեական հետապնդումը սկսվել է 2018-ին Հայաստանում իշխանափոխությունից հետո։ Այդ ժամանակ էլ Ռոբերտ Քոչարյանը հայտարարել էր քաղաքականություն վերադառնալու մասին։ ՀՀ երկրորդ նախագահին երեք անգամ կալանավորել են։
Կալանավայրում նա ընդհանուր առմամբ 500 օր է անցկացրել։
2020 թվականի հունիսին Վերաքննիչ դատարանը նրան գրավի դիմաց ազատ արձակելու որոշում է կայացրել։