ԵՐԵՎԱՆ, 9 փետրվարի – Sputnik.Հայաստանում կառուցվող ինժեներական քաղաքն արդեն 7 հայտատու ունի: Այսօր հրավիրած տարեկան ամփոփիչ ասուլիսում տեղեկությունը հայտնեց բարձր տեխնոլոգիական արդյունաբերության նախարար Հակոբ Արշակյանը:
«Սա միայն սկիզբն է: Այս տարի արդեն կսկսվեն աշխատանքները: Կոնստրուկտորական նախագծային աշխատանքներն արդեն պատրաստ են, և դրանք արդեն դրվում են շինարարության համար մրցույթների»,- ասաց նախարարը:
Նա նաև հայտնեց, որ ինժեներական քաղաքում հողատարածքներ ստանալու համար պետությունը կաջակցի ծրագրի մասնակից ընկերություններին՝ նվիրատվության կամ անվճար շահագործման տարբերակով:
Նախարար Արշակյանը հայտնեց, որ 2020թ-ին ինժեներական քաղաքում հիմնվել է Երևանի պոլիտեխնիկական համալսարանի էլեկտրոնային համակարգերի և չափիչ սարքերի ամբիոնը, որը կրթական նոր ծրագրեր է իրականացնելու ու որտեղ դասավանդելու են նոր մասնագետներ:
Հիշեցնենք՝ Ինժեներական քաղաքը Հայաստանում նախատեսված է կառուցել Բագրևանդի տարածքում: Այն ծրագրվել էր գործարկել 2021 թ-ից:
Կառավարության ներկայացրած նախագծի համաձայն`«Ինժեներական քաղաք» ծրագրի կյանքի կոչմամբ Հայաստանը պետք է աշխարհին ներկայանա որպես նորարարական ճարտարագիտական լուծումների տարածաշրջանային հանգույց։
Նախատեսվում է տեխնոլոգիական ժամանակակից ենթակառուցվածքի ստեղծում, ոլորտի բարձրակարգ մասնագետների պատրաստում և վերապատրաստում, նոր աշխատատեղերի ստեղծում, ստարտափների հիմնում, ՏՏ ոլորտի կազմակերպությունների գործունեության արդյունավետության բարձրացում և արտահանման ծավալի աճ:
Ծրագիրը պետք է նպաստի նաև ճարտարագիտական տեխնոլոգիաների, արտադրանքի և ծառայությունների արտահանմանը դեպի համաշխարհային շուկա։