ԵՐԵՎԱՆ, 7 փետրվարի – Sputnik. Չարտոնված բողոքի ակցիաներին մասնակցելու պատճառով Ռուսաստանից երեք օտարերկրացի դիվանագետի արտաքսումը հարկադրված քայլ է։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Սա ոչ արտոնված միջոցառումներին, հետևաբար ապօրինի ակցիաներին, մասնակցելու համար Եվրամիության երեք երկրների դիվանագետների արտաքսում է», – Զախարովայի խոսքերն է մեջբերում ՌԻԱ Նովոստին։
Ավելի վաղ Ռուսաստանը հայտարարել էր օտարերկրյա դիվանագետների արտաքսման մասին։ Նման բողոքը կապված էր հունվարի 23-ի չարտոնված ցույցերին եվրոպական գերատեսչությունների ներկայացուցիչների մասնակցության հետ։ Դիվանագետներին անցանկալի անձ են հռչակել։ Առաջիկայում նրանք պետք է լքեն երկիրը։
ՌԴ ԱԳՆ–ն ավելի վաղ խորհուրդ էր տվել ընդդիմադիր Ալեքսեյ Նավալնու հետ կապված իրավիճակը մեկնաբանող օտարերկրյա քաղաքական գործիչներին հարգել միջազգային իրավունքն ու զբաղվել սեփական երկրի խնդիրներով։ Արտգործնախարար Սերգեյ Լավրովը նշել էր, որ այդ թեմայի վերաբերյալ արևմտյան քաղաքական գործիչների հայտարարությունները կրկնվում են։ ՌԴ նախագահի մամուլի քարտուղար Դմիտրի Պեսկովը հայտարարել էր, որ Կրեմլում մտադիր չեն ականջալուր լինել Նավալնու վերաբերյալ արտասահմանից ստացվող հայտարարություններին։
Նավալնին պետք է Արևմուտքին՝ Ռուսաստանում իրավիճակն ապակայունացնելու համար․ Պատրուշև
Պնդումներն այն մասին, թե Նավալնուն հետապնդում են բացառապես իր քաղաքական գործունեության համար, հերքել է ՄԻԵԴ–ը։ Ստրասբուրգը քաղաքական ենթատեքստ «Իվ Ռոշեի» գործում (բողոք է ներկայացվել հենց այդ գործի վերաբերյալ) չի տեսել, թեև տնային կալանքի համար փոխհատուցում է նշանակել, որը ՌԴ իշխանությունները լիարժեք վճարել են։