Արցախի տեղահանված բնակչության շրջանում սոցիալական խնդիրներն ամբողջությամբ լուծված չեն։ Այս պահի դրությամբ Հայաստանում գտնվող ավելի քան 100 ընտանիքներ էլ ազատ բնակֆոնդի և նվազագույն պայմանների ապահովման դեպքում պատրաստ են վերադառնալ Արցախ։ Տեղեկությունը Sputnik Արմենիայի հետ զրույցում հայտնեց Ասկերանի վարչակազմի ղեկավարի տեղակալ Արմեն Մանգասարյանը` արձագանքելով ՀՀ աշխատանքի և սոցիալական հարցերի նախարար Մեսրոպ Առաքելյանի հայտարարությանը։
Իսկ Առաքելյանը փետրվարի 3-ին խորհրդարանում հայտարարել էր, որ Արցախի սոցիալական և հումանիտար խնդիրներն արդեն լուծվել են։
«Գույքի, բնակֆոնդի մասով խնդիրները դեռևս կան։ Եթե այդ ամենը չենք համարում սոցիալական խնդիր, ապա կարող ենք ասել, որ բոլոր հարցերը լուծված են»,- ասաց նա։
Արցախ վերադարձածների մեջ էլ քիչ չեն ընտանիքները, որոնք դեռևս անհրաժեշտ գույքով, տեխնիկայով ապահովված չեն։ Սննդի հարցում էլ են հաճախ խնդիրներ ծագում։
«Իհարկե, Հայաստանի կառավարությունն այդ 68.000-ներով, 300.000-ներով աջակցում է, բայց նախնական որոշումն այնպիսին է, որ եթե այդ գումարները տրամադրում են, էլ սննդով չեն ապահովելու, դա էլ է խնդիր, որը միշտ կա»,- նշեց Մանգասարյանը։
Նրա խոսքով` հանրապետության ամբողջ տարածքում շուրջ 1000 բնակարանի նորոգման աշխատանքներն ընթացքի մեջ են, ապագայում մոտ 200-ը վերակառուցման ծրագրով կկառուցեն։
«Նոր կառուցվելիք բնակարանների շինարարական աշխատանքները մոտակա օրերին սկսվելու են, բայց նորոգվող տների մեծ մասը ժամանակավոր ապաստարան են։ Աշխատում ենք, որ մարդկանց համար գոնե մինիմալ պայմաններ լինի, բայց դա հարցի լուծում չէ. առաջինը` այդ տների մի մասը սեփականատերեր ունի, երկրորդ` չենք կարող մեկի համար նոր բնակարան կառուցել, մյուսի հին տունը նորոգենք, ասենք` սա քո մշտական տունն է»,- պարզաբանեց վարչակազմի ղեկավարի տեղակալը։
Մանգասարյանի խոսքով`մինչ այս պահը Ասկերանի շրջանում ընդունել են 427 ընտանիք` շուրջ 1700 մարդ, որոնց թվում են ոչ միայն Ասկերանի շրջանի գյուղերից, այլև Հադրութից, Շուշիից տեղահանված արցախցիները։