ԵՐԵՎԱՆ, 3 փետրվարի – Sputnik. Արցախյան 44-օրյա պատերազմում վիրավորված ու հաշմանդամություն ստացած զինծառայողներն ու մոբիլիզացիայի արդյունքում պատերազմին մասնակցած քաղաքացիներն այսօր դժվարություններ ունեն աշխատանքի հարցում։ Այս մասին այսօր ԱԺ–ի արտահերթ նիստում հայտարարեց ԱԺ անկախ պատգամավոր Սոֆյա Հովսեփյանը` այդ խնդրի վրա հրավիրելով Աշխատանքի և սոցիալական հարցերի նախարար Մեսրոպ Առաքելյանի ուշադրությունը։
«Իրենք չեն կարող ուղղակի պարապուրդի մատնվել, չեն կարող պետության տված թոշակի վրա հույս դնել։ Պետք է մտածել ու մշակել ինչ-որ քայլեր`այս մարդկանց զբաղվածությունն ապահովելու համար»,– ասաց պատգամավորը` հավելելով, որ նման իրավիճակում հայտնված անձանցից շատերն արդեն խոսում են արտագաղթելու մասին։
Նրա խոսքով` խնդրին հիմնականում բախվել են ոստիկանության, ԱԱԾ–ի, ԶՈւ աշխատակիցները, որտեղ սահմանված են հստակ չափորոշիչներ։ Սոֆյա Հովսեփյանի դիտարկմամբ, այդ չափորոշիչներին չբավարարելու պատճառով պատերազմի մասնակից զինհաշմանդամները փաստացի վերածվելու են գործազուրկների։
Վիրավոր զինվորները կկարողանան քայլակ կամ սայլակ ստանալ առանց հաշմանդամության կարգի