ԵՐԵՎԱՆ, 3 փետրվարի - Sputnik. Արցախում փետրվարի 2-ին իրականացված որոնողական աշխատանքների ընթացքում ևս մեկ հայի աճյուն է հայտնաբերվել։ Sputnik Արմենիայի հետ զրույցում տեղեկությունը հայտնեց Արցախի ԱԻ պետական ծառայության հասարակայնության հետ կապերի բաժնի ղեկավար Հունան Թադևոսյանը։
Նրա խոսքով ՝ աճյունը հայտնաբերվել է Հադրութի հարակից տարածքում։ Դին անճանաչելի է և պարզ չէ՝ քաղաքացիակա՞ն է, թե՞ զինծառայող։ Ինքնությունը պարզելու համար նշանակվել է դատաբժշկական փորձաքննություն։
Թադևոսյանը նշել է, որ այսօր որոնողական աշխատանքներ չեն իրականացվելու ադրբեջանական կողմի արգելքի պատճառով։
«Աշխատանքներ պետք է իրականացվեին Ջրականի (Ջաբրաիլ) և Վարանդայի (Ֆիզուլի) տարածքում, բայց ադրբեջանական կողմն արգելել է, սակայն որևէ բացատրություն չի տվել, թե ինչի հետ է կապված այդ որոշումը», - ասել է Թադևոսյանը:
Հիշեցնենք, որ որոնողական աշխատանքների մեկնարկից ի վեր հայտնաբերվել են 1355 զինծառայողների և քաղաքացիական անձանց մարմիններ և աճյուններ:
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։
Հայաստանն ապահովում է տրանսպորտային կապ Ադրբեջանի արևմտյան շրջանների և Նախիջևանի Ինքնավար Հանրապետության միջև։
Ինչ տվեց Արցախի վերաբերյալ եռակողմ հայտարարությունը․ քարտեզ
Շփման գծի երկայնքով Լեռնային Ղարաբաղում և Լաչինի միջանցքում հաստատվում են ռուսական խաղաղապահ ուժեր, որոնք մնում են հինգ տարի ժամանակով` ավտոմատ երկարացման հնարավորությամբ, եթե հաջորդ հինգ տարվա համար կողմերը ժամկետի լրանալուց վեց ամիս առաջ չեն հայտարարում այս դրույթի կիրառությունը դադարեցնելու մասին։
Նշվում է նաև, որ ներքին տեղահանվածները և փախստականները վերադառնում են ԼՂ և հարակից շրջաններ, իրականացվում է ռազմագերիների փոխանակություն և մյուս պահվող անձանց փոխանակություն, ապաարգելափակվում են բոլոր տնտեսական և տրանսպորտային կապերը տարածաշրջանում։