ԵՐԵՎԱՆ, 3 փետրվարի - Sputnik. Հայ ժողովուրդը պետք է իմանա, որ 2018 թվականին դեկտեմբերին խորհրդարան է բերել 88 հոգանոց պատգամավորական խումբ, որը կարծում է, որ կարևոր չէ, թե Արցախն ում հողն է, ուզում է մոռանանք պատերազմն ու մտածում է՝ ոնց անենք, որ ադրբեջանցիների հետ խաղաղ ապրենք։ Այս մասին լրագրողների հետ զրույցում ասաց ՀՅԴ-ական Գեղամ Մանուկյանը։
«Դրան գումարենք Նիկոլ Փաշինյանի այն կարծիքը, որ Շուշին հայկական չէ, մեկ այլ ապուշ պատգամավորի խոսքը, թե Կարսը հայկական չէ, այնտեղ քրդեր են ապրում, և այսպես շարունակ»,-ասաց Մանուկյանը։
Նշենք, որ Հայրենիքի փրկության շարժումը բողոքի ակցիա է անցկացնում Ազգային ժողովի շենքի դիմաց՝ Դեմիրճյան փողոցում, որտեղ հավաքվել են տասնյակ քաղաքացիներ և շարունակում են պահանջել կառավարության ու վարչապետի հրաժարականը:
Զուգահեռ ժամը 11-ին ԱԺ-ում արտահերթ նիստն է մեկնարկել, ցուցարարները փորձում են խոչընդոտել ԱԺ պատգամավորների մուտքը խորհրդարան։
«Հերթական անգամ իշխանությունը փորձ է անում հապշտապ օրենքների փոփոխություններ իրականացնել։ Էլի ձևափոխում են դատական համակարգը »,-ասաց Մանուկյանը և շեշտեց, որ ներկայիս իշխանությունն ամեն ինչ անում է ազդելու համար այն դատավորների վրա, որոնք դեռ փորձում են արդարացի որոշում կայացնել և մարդկանց անհիմն չկալանավորել։
Որոշ ժամանակ անց ոստիկանները բերման ենթարկեցին Գեղամ Մանուկյանին։
Հիշեցնենք, որ բողոքի ակցիաները՝ վարչապետի հրաժարականի պահանջով, սկսվել են նոյեմբերի 9-ի եռակողմ հայտարարության ստորագրումից հետո։
Ընդդիմադիրները բողոքի ակցիա են իրականացնում ԱԺ-ի մոտ. կա բերման ենթարկված առնվազն մեկ մարդ