ԵՐԵՎԱՆ, 2 փետրվարի – Sputnik. Մարտի 1-ի քրեական գործը կապված է ընտրական ու հետընտրական գործընթացների հետ։ Այսօր Երևանի ընդհանուր իրավասության դատարանում` «Մարտի 1-ի» գործով դատավարության ժամանակ հայտարարեց ՀՀ երկրորդ նախագահ Ռոբերտ Քոչարյանը։
«Սա ամբողջությամբ բացառապես քաղաքական պրոցես է` իրավական որոշակի կարգավորումներով։ Եվ ակնկալել, որ այս դատավարության ժամանակ ընդհանրապես քաղաքական կոմպոնենտ չպիտի լինի, նշանակում է ընդհանրապես այս գործը չլսել»,– ասաց Քոչարյանը` դատարանին կոչ անելով ու խնդրելով հաշվի առնել այդ հանգամանքը։
Երկրորդ նախագահն այս հայտարարությամբ հանդես եկավ այն ժամանակ, երբ նիստը վարող դատավոր Աննա Դանիբեկյանը թույլ չտվեց գործով ամբաստանյալ, ՀՀ նախկին փոխվարչապետ Արմեն Գևորգյանին ավարտել իր հայտարարությունը` պատճառաբանելով դրա քաղաքական բովանդակությունը։
Նշենք, որ Արմեն Գևորգյանն իր ելույթում կարծիք հայտնեց, որ այս գործով փորձ է արվում 2008թ–ի իրադարձությունների ողջ մեղքը բարդել բանակի վրա, և որ իշխանությունն այսօր էլ շարունակում է հասարակությանը բաժանել սևերի ու սպիտակների։
Արմեն Գևորգյանի ելույթը վերաբերում էր իր փաստաբան Էրիկ Ալեքսանյանի ներկայացրած միջնորդությանը, որով վերջինը դատավոր Աննա Դանիբեկյանին առաջարկում էր ինքնաբացարկ հայտնել` հրաժարվելով գործի վարույթից։
Խաղաքարտերը փոխվում են. քաղաքագետը` Ռոբերտ Քոչարյանի` ընտրություններին մասնակցելու մասին
Հիշեցնենք, որ ՀՀ երկրորդ նախագահը մասնակցում է 2008 թվականի մարտի 1-ի դեպքերի վերաբերյալ քրեական գործի դատաքննությանը: Նրա դեմ քրեական հետապնդումը սկսվել է 2018-ին Հայաստանում տեղի ունեցած իշխանափոխությունից հետո։ Այդ ժամանակ էլ Ռոբերտ Քոչարյանը հայտարարել էր քաղաքականություն վերադառնալու մասին։ ՀՀ երկրորդ նախագահին երեք անգամ կալանավորել են։ Կալանավայրում ընդհանուր առմամբ 500 օր է անցկացրել։
2020 թվականի հունիսին Վերաքննիչ դատարանը նրան գրավի դիմաց ազատ արձակելու որոշում է կայացրել։
Քոչարյանը բազմիցս հայտարարել է, որ իր դեմ հարուցված քրեական գործն ամբողջությամբ շինծու է և ոչ այլ ինչ է, քան քաղաքական հետապնդում։
Ի՞նչ մտավախություններ ունի Ռոբերտ Քոչարյանը ճանապարհների ապաշրջափակման հեռանկարից