ԵՐԵՎԱՆ, 30 հունվարի — Sputnik. Ռուսաստանցի երգիչ Իգոր Սարուխանովին ընդգրկել են Ուկրաինայի «սև ցուցակում»։ Արտիստն ասել է, որ Ուկրաինայի ազգային անվտանգության ծառայության այդ որոշումը «շինծու քաղաքական ակցիա է»։
Ռուսական «Հինգերորդ ալիքին» տված հարցազրույցում Սարուխանովը հայտարարել է, որ իրեն չի վախեցնում արտասահմանյան հյուրախաղերից զրկվելու հեռանկարը, բայց տխրեցնում է այն փաստը, որ սովորական քաղաքացիներին արգելում են լսել սիրելի երաժշտին:
«Ես քաղաքականության հետ ոչ մի կապ չունեմ։ Տարօրինակ է, որ սիրո մասին երգող մարդն ինչ-որ սպառնալիք է ներկայացնում Ուկրաինայի ազգային անվտանգության համար», - ծիծաղելով ասել է արտիստը։
Սարուխանովի խոսքով՝ ինքը կարող էր հասկանալ Կիևի տրամաբանությունը, եթե իր անունը «սև ցուցակում» ընդգրկեին դեռ 2 տարի առաջ` Դոնբասի ելույթներից հետո: Բայց այն, ինչ տեղի է ունենում այսօր, արտիստի կարծիքով` ոչ մի ադեկվատ բացատրություն չունի։
«Արյունով հայ» Սարուխանովին Երևան չեն հրավիրում, Բաքու էլ ինքը չի մեկնում
«Այդ իրադարձությունների վեց տարիները չեն կարող խաչ քաշել 40-ամյա շփման (ժողովրդի հետ. խմբ.) վրա։ Պատկերացնում եք, թե քանի անգամ եմ այնտեղ եղել։ Քանի համերգ եմ տվել: Երևի ռադիոյում ու հեռուստատեսությունում ինձ հետ կապված բաներն էլ կարգելեն։ Դա շատ ցավալի է, անկեղծ ասած... Հիմարություն է», - եզրափակել է Սարուխանովը։
Նշենք, որ Ուկրաինայի «սև ցուցակում» ընդգրկվել են տարբեր երկրների (այդ թվում՝ Ռուսաստանի) 160-ից ավելի քաղաքացիներ։
Ինչպես հայերենը վեճի թեմա դարձավ Սարուխանովի ու Գաբրելյանովի համար