ԵՐԵՎԱՆ, 16 հունվարի - Sputnik. «Հայրենիքի փրկության շարժումը» մարզային հանդիպումների շրջանակում այսօր Վանաձորում է։ «Լոռի» կենտրոնում հանդիպումը մեկնարկեց տերունական աղոթքով։
Իր խոսքի սկզբում վարչապետի միասնական թեկնածու Վազգեն Մանուկյանը նշեց մի քանի փաստեր, որոնք, ըստ նրա, վկայում են ներկա ղեկավարության թույլ տված սկզբունքային սխալների մասին։
Ըստ նրա՝ նախևառաջ պատերազմը կարելի էր կանխել, իսկ եթե պատերազմին մեր բանակը պատրաստված լիներ, այդ ամուր դիրքերը մենք կարող էինք պահել։ Վստահ է՝ եթե «հիմար հրամաններ չլինեին, բանակում կարգուկանոն լիներ», այդքան կորուստներ չէինք ունենա։ Հաջորդ փաստն, ըստ նրա, այն է, որ պատերազմը կարելի էր կանգնեցնել ավելի շուտ և ավելի քիչ կորուստներով։
«Շուշին ոչ թե գրավել են ադրբեջանցիները, այլ տվել են մերոնք։ Դավաճանության, թե հիմարության պատճառով՝ դա արդեն այլ հարց է»,- շարունակեց թվարկումը ՀՀ առաջին վարչապետը։
Ինչ վերաբերում է ստորագրված եռակողմ հայտարարությանը՝ Մանուկյանը վստահ է՝ ճիշտ ու գրագետ բանակցությունների արդյունքում հնարավոր էր մեզ համար ավելի բարենպաստ պայմաններով այն կնքել։
«Իհարկե, լավ էր՝ պատերազմը վերջացավ, բայց այդ փաստաթուղթը կործանարար խայտառակություն էր մեր ժողովրդի, մեր պետության համար։ Մենք կորցրեցինք հազարավոր երիտասարդներ, նույնիսկ կարծում եմ՝ պարտության վրա ավելի շատ մարդ կորցրեցինք, քան հաղթանակի համար»,- ասում է Մանուկյանը։ Հավելում է, որ այսքան զոհերի կողքին հարյուրավոր գերիներ ունենք և բազմաթիվ կորուստներ, խոսքը ոչ միայն տարածքային կորուստների մասին է, այլև՝ տնտեսական, ռազմական և այլն։
«Կործանարար խաղաղության մեջ մտանք»,- եզրահանգում է Մանուկյանը։
Եթե շուտ վերջացնեինք այս գործը, Սյունիքը պահպանած կլինեինք. Վազգեն Մանուկյան
Հիշեցնենք` 2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։
Հայաստանն ապահովում է տրանսպորտային կապ Ադրբեջանի արևմտյան շրջանների և Նախիջևանի Ինքնավար Հանրապետության միջև։
Ինչ տվեց Արցախի վերաբերյալ եռակողմ հայտարարությունը․ քարտեզ
Շփման գծի երկայնքով Լեռնային Ղարաբաղում և Լաչինի միջանցքում հաստատվում են ռուսական խաղաղապահ ուժեր, որոնք մնում են հինգ տարի ժամանակով` ավտոմատ երկարացման հնարավորությամբ, եթե հաջորդ հինգ տարվա համար կողմերը ժամկետի լրանալուց վեց ամիս առաջ չեն հայտարարում այս դրույթի կիրառությունը դադարեցնելու մասին։
Նշվում է նաև, որ ներքին տեղահանվածները և փախստականները վերադառնում են ԼՂ և հարակից շրջաններ, իրականացվում է ռազմագերիների փոխանակություն և մյուս պահվող անձանց փոխանակություն, ապաարգելափակվում են բոլոր տնտեսական և տրանսպորտային կապերը տարածաշրջանում։
Հայտարարության ստորագրումից հետո ՀՀ վարչապետ Նիկոլ Փաշինյանը Facebook–ի իր էջում գրեց, որ անձամբ իր և բոլորի համար չափազանց ծանր որոշում է կայացրել: