ԵՐԵՎԱՆ, 16 հունվարի - Sputnik. Հայրենիքի փրկության շարժման վարչապետի միասնական թեկնածու Վազգեն Մանուկյանն այսօր Վանաձորի «Լոռի» կենտրոնում հանդիպում է վանաձորցիների հետ։ Մինչ հանդիպումը սկսելը ՀՀ առաջին վարչապետ Վազգեն Մանուկյանը պատասխանեց լրագրողների հարցերին, որոնք վերաբերում էին երեկ Գյումրիում տեղի ունեցած միջադեպին։
Վազգեն Մանուկյանի խոսքով՝ «այդ մարդիկ խայտառակում են գյումրեցու անունը»։ Անկեղծանում է, որ ինքն անձամբ կիսով չափ գյումրեցի է՝ մայրն է Գյումրուց։ Նրա խոսքով՝ իսկական Գյումրին այն Գյումրին էր, որը «լցնում էր դահլիճը, փողոցում մոտենում, խոսում էր իր հետ»։ Վստահ է, որ այն, ինչ երեկ տեղի ունեցավ Գյումրիում, կազմակերպված էր։ Ասում է՝ նույնիսկ գիտի, թե ով էր դրա հետևում կանգնած։
«Մեր բակում մեկը կա, որ անօթևան է՝ շիշ է հավաքում, վիրավորական իմաստով չէ, բայց այդ մարդկանց «բոմժ» են ասում։ Այսօր առավոտյան ասաց՝ պարոն Մանուկյան, մեզ ինչի՞ եք վիրավորել, այդ տականքների հետ եք մեզ համեմատել»։
Հիշեցնենք, որ հունվարի 15-ին Մանուկյանի մարզային այցելության ժամանակ մի խումբ շիրակցիներ փակել էին Գյումրի-Երևան ավտոճանապարհը`«Վազգեն, դավաճան» վանկարկելով։ Ավելի ուշ Գյումրիում Վազգեն Մանուկյանը ճանապարհը փակելու դրվագին անդրադառնալիս նրանց անվանել էր «բոմժեր»։
«Հույս չունենաք, որ լավ ենք ապրելու». Վազգեն Մանուկյանը Գյումրիում է