ԵՐԵՎԱՆ, 16 հունվարի - Sputnik. «Հայրենիք» կուսակցության առաջնորդ, ԱԱԾ նախկին տնօրեն Արթուր Վանեցյանը վստահ է, որ բանականություն ունեցող որևէ անձ չի կարող հավատալ այն ստահոդ լուրերին, որ տարածում են իր և իր կողմնակիցների մասին։ Մասնավորապես, Վանաձորում լրագրողների հետ զրույցում նա անդադարձել է ԱԱԾ նախկին տնօրեն, Քննչական կոմիտեի նախագահի նորանշանակ տեղակալ Արգիշտի Քյարամյանի հայտարարություններին, թե Արցախում պատերազմի ժամանակ «Հայրենիք» զորախումբը լքել է իրեն վստահված դիրքը։
«Դասալիքն իրենք են՝ իրենց կյանքով, իրենք փախել են ամեն ինչից, իրենք պարտվել են այս պատերազմում, իրենց պատճառով մենք կորցրել ենք մեր հայրենիքի արցախյան հատվածի 75 տոկոսը, ունենք 5000-ից ավելի զոհեր, 10.000 վիրավորներ, անհետ կորածներ, գերիներ, խարխլված անվտանգային համակարգ, խայտառակ իրավիճակ: Երբ Արգիշտի Քյարամյանը նշանակվեց ԱԱԾ տնօրեն, ինձ հարց ուղղեցին, ասացին՝ ինչպե՞ս եք գնահատում։ Ես ասացի՝ «նրա նշանակումը ազգային անվտանգության սպառնալիք է»։ Ցավոք սրտի, այդ կանխատեսումս իրականություն դարձավ»,- ասաց Վանեցյանը։
Նրա խոսքով՝ ռազմի դաշտում, երբ պատահաբար հանդիպել է Քյարամյանին, առաջարկել է բոլոր տարաձայնությունները մի կողմ թողնել և լծվել հայրենիքի պաշտպանության գործին։ Վանեցյանի խոսքով՝ եթե Քյարամյանն իրենց այս պայմանավորվածությունը խախտում է իր կամքով, ապա «դա տղամարդուն վայել չէ»։
«Եթե նա խախտում է այդ պայմանավորածությունները և կատարում է ինչ-որ պատվերներ, դա առավել ևս սազական չէ տղամարդուն: Արթուր Վանեցյանը, «Հայրենիք» զորախումբն ամբողջությամբ ներգրավված են եղել ռազմական գործողություններում»,- նշում է Վանեցյանը։
Ինչ է տեղի ունեցել Շուշիում, Վանեցյանը լքե՞լ է մարտադաշտը. Քյարամյանը մանրամասներ է պատմել
Շեշտում է՝ պատերազմի երկրորդ օրից այնտեղ են եղել, ապա եկել են Հայաստան ու ավելի մեծ կազմով մեկնել Արցախ։ Պնդում է, որ մարտնչել են ամենադժվար, ամենաթեժ տեղերում: