ԵՐԵՎԱՆ, 15 հունվարի – Sputnik. ՀՀ վարչապետ Նիկոլ Փաշինյանի որոշմամբ` միջգերատեսչական աշխատանքային խումբ կստեղծվի ռազմական գործողությունների և եռակողմ հայտարարության դրույթների իրագործման հետևանքով Սյունիքում առկա և հնարավոր խնդիրների բացահայտման, օպերատիվ արձագանքման ուղղությամբ տարվող աշխատանքները համակարգելու նպատակով:
«ՀՀ տարածքային կառավարման և ենթակառուցվածքների նախարարը պետք է ապահովի աշխատանքային խմբի կողմից վերհանված հարցերի լուծման համար անհրաժեշտ իրավական ակտերի նախագծերի կազմումը, ինչպես նաև համապատասխան իրավական ակտերի նախագծերը սահմանված կարգով ներկայացնի վարչապետի աշխատակազմ»,–նշված է որոշման մեջ։
Նշենք, որ այսօր ՀՀ մարդու իրավունքների պաշտպան Արման Թաթոյանը ևս մեկ անգամ բարձրաձայնել էր, որ Սյունքում սահմանազատման աշխատանքներն իրականացում են մարդու իրավունքների կոպիտ խախտումներով։ Թաթոյանը կարծիք էր հայտնել, որ անհրաժեշտ է ստեղծել հանձնաժողովներ, որպեսզի սահմանազատման աշխատանքները չիրականացվեն մեխանիկական եղանակով։
Ավելի վաղ ՄԻՊ–ը մի ուշագրավ դեպք էր պատմել. Սյունիքի բնակիչներից մեկի անասնագոմը բաժանվել էր երկու մասի` հայտնվելով «ադրբեջանական» և «հայկական» կողմերում։
Թաթոյանը հայտնել էր նաև, թե որ համայնքում որքան տարածք ենք կորցրել. Տեղ համայնքում, որի մեջ են մտնում Խոզնավարը, Խնածախը, 2000 հեկտարից ավելի մասնավոր սեփականություն կա, որից զրկվել ենք։
Սյունիքը համարում եմ մեր պետականության ողնաշարը. Նիկոլ Փաշինյան
Շուռնուխում 11 տուն է անցել թշնամուն, Որոտանում` 326 հեկտարից ավելի մասնավոր և համայնքային սեփականություն համարվող հողատարածքներից ենք զրկվել։ 18-20 այգեգործական տնակներ Որոտանում կառուցվել են այն հողերի վրա, որոնք ՀՀ գործկոմի որոշումներով են հատկացվել մարդկանց, որոնցից նույնպես զրկվել ենք։
Ագարակ գյուղում մարդիկ զրկվել են 60 հա մասնավոր և համայնքային սեփականություն համարվող տարածքից, Եղվարդում` 110 հա վարելահողից և 50 հա արոտավայրից, Ճակատենում` 30 հա վարելահողից և 25 հա արոտավայրից։