ԵՐԵՎԱՆ, 13 հունվարի – Sputnik. Տեսանելի որևէ ապագայում այս պայմաններում հնարավոր չէ ադրբեջանցիների հետ բարիդրացիական հարաբերություններ ունենալ։ Նման կարծիք հայտնեց Արցախի նախագահի աշխատակազմի ղեկավար Արտակ Բեգլարյանը` ֆեյսբուքյան իր էջում ուղիղ եթերի ժամանակ պատասխանելով օգտատերերից մեկի հարցին։
«Ադրբեջանական հասարակությունը տասնամյակներ շարունակ ներարկվել է հայատյացության տրամադրություններով, որի արտացոլանքն էր պատերազմի ժամանակ բազմաթիվ հանցագործությունները։ Այն, որ իրենց հասարակությունը շատ դրական է արձագանքում խոշտանգումներին, դաժանագույն պատկերներին, դա փաստում է այն մասին, որ ադրբեջանցիները պատրաստ չեն հայերի հետ բարիդրացիական հարաբերությունների»,–ասում է Բեգլարյանը։
Նրա խոսքով` նույնիսկ եթե քաղաքական կամք ունենան, պետք է բավականին երկար ժամանակ անցնի, որպեսզի Ադրբեջանի հասարակության միջից որոշ չափով հայատյացությունը դուրս գա։
Ադրբեջանը կոպիտ կերպով խախտում է եռակողմ հայտարարությունը. Արցախի ԱԳՆ
Ամեն դեպքում, Բեգլարյանը կոչ է անում արցախցիներին վերադառնալ ու իրենց մշտական բնակության վայրերում ապրել` ասելով, որ պետությունն էլ իր հերթին պետք է նրանց անվտանգությունն ապահովի։ Բեգլարյանը նշեց, որ պատերազմից հետո իր կնոջն ու 2.5 տարեկան երեխային Արցախ է բերել և առաջիկայում էլ պատրաստվում է ընտանիքի հետ ապրել Արցախում։