ԵՐԵՎԱՆ, 12 հունվարի – Sputnik. ՀՀ մարդու իրավունքների պաշտպան Արման Թաթոյանը վստահեցնում է` սահմանազատման աշխատանքների արդյունքում խախտվել է նաև մեր քաղաքացիների սեփականության իրավունքը։ Թաթոյանն այսօր կայացած մամուլի ասուլիսի ժամանակ ներկայացրեց, թե սահմանամերձ որ գյուղերից որքա՞ն տարածք ենք հանձնել Ադրբեջանին։
Նա ասաց, որ սահմանազատման արդյունքում մարդիկ ոչ միայն սեփական ապրուստը վաստակելուց են զրկվել, այլ նաև բիզնեսով զբաղվելուց։ Թաթոյանը հայտնեց` սեփականության իրավունքի խախտման առնչությամբ 2 խնդիր կա` Ադրբեջանին անցած տարածքներում կան տներ, հողեր, որոնց սեփականության վկայականները տրվել են ԽՍՀ-ի կամ էլ ՀՀ անկախ մարմինների կողմից։ Այսինքն` երկու հիմնական տարբերություն կա` գեոդեզիական և տեղագրական քարտեզների. հարց է առաջանում, թե նախկինում ինչպե՞ս են հողահատկացում արել։
«Օրինակ` Տեղ համայնքում, որի մեջ են մտնում Խոզնավարը, Խնածախը, 2000 հեկտարից ավելի մասնավոր սեփականություն կա, որից զրկվել ենք։ Շուռնուխում 11 տուն է անցել թշնամուն, Որոտանում` 326 հեկտարից ավելի մասնավոր և համայնքային սեփականություն համարվող հողատարածքներից են զրկվել։ 18-20 այգեգործական տնակներ Որոտանում կառուցվել են այն հողերի վրա, որոնք ՀՀ գործկոմի որոշումներով են հատկացվել մարդկանց, որոնցից նույնպես զրկվել ենք»,–ասաց Թաթոյանը։
Նա շարունակեց թվարկել` ասելով, որ Ագարակ գյուղում մարդիկ զրկվել են 60 հա մասնավոր և համայնքային սեփականություն համարվող տարածքից, Եղվարդում` 110 հա վարելահողից և 50 հա արոտավայրից, Ճակատենում` 30 հա վարելահողից և 25 հա արոտավայրից։
Գորիսից Որոտան, Շուռնուխ և Կապան տանող 21 կմ-ն Ադրբեջանի վերահսկողության տակ է. Թաթոյան
Թաթոյանն ասաց նաև, որ Գեղարքունիքում էլ կա այս նույն խնդիրը։ Նա կարծում է, որ մարդիկ փոխհատուցման իրավունք ունեն, և Ադրբեջանի իշխանության հատուցման պարտավորությունը պետք է սա լինի։ ՄԻ պաշտպանը ՄԻԵԴ–ում ՀՀ ներկայացուցչի հետ քննարկել է այս հարցը, և այժմ որոշում են ինչպես պետք է ձևակերպեն այս խնդիրներն իրավական տեսանկյունից։