ԵՐԵՎԱՆ, 12 հունվարի – Sputnik. Հայաստանի նախագահ Արմեն Սարգսյանը շնորհավորական ուղերձ է հղել ժողովրդական արտիստ Ռուբեն Մաթևոսյանին՝ ծննդյան 80-րդ տարեդարձի առթիվ։ Այս մասին տեղեկացնում է նախագահի կայքը։
«Ընդունեք ջերմ շնորհավորանքներս Ձեր ծննդյան 80-ամյակի առթիվ։ Տասնամյակներ շարունակ հայ ժողովրդական, գուսանական ու աշուղական, ինչպես նաև ժամանակակից շատ հայ կոմպոզիտորների երգեր Ձեր ձայնի ու կատարողական արվեստի շնորհիվ են ճանաչելի դարձել Հայաստանում, Սփյուռքում և արտասահմանյան շատ երկրներում՝ գրավելով հայ և օտար ունկնդրի սրտերը:
Հայ արվեստին ու մշակույթին Ձեր հավատարմությամբ, Ձեր անզուգական արվեստով, Հայրենիքն ու ազգը սիրելու ու բարձրացնելու Ձեր կարողությամբ Դուք օրինակ եք ծառայել և ծառայում կատարողների երիտասարդ սերունդների համար», – գրված է նախագահի շնորհավորանքում։
Նախագահը մաղթել է արտիստին առողջություն, հաջողություն և ստեղծագործական անսպառ եռանդ։
Ռուբեն Մաթևոսյանը ՀԽՍՀ ժողովրդական արտիստ է, Երևանի պատվավոր քաղաքացի։ 1986 թվականից դասավանդում է Երևանի էստրադային և ջազային արվեստի քոլեջում, 1990 թվականից՝ Երևանի կոնսերվատորիայում։ Ունի պրոֆեսորի կոչում։
«Հայ եմ ու սենտիմենտալ», կամ ինչպես Վիլյամ Սարոյանը նույն կնոջ հետ ամուսնացավ 2 անգամ
Ռուբեն Մաթևոսյանի երգացանկում կան հայկական ժողովրդական, աշուղական, ժամանակակից հայ կոմպոզիտորների երգեր, ռոմանսներ։ Նրա լավագույն կատարումներից են՝ «Հորովել», Շերամի «Պարտեզում վարդ էր բացված», «Դու իմ մուսան ես», Ջիվանու «Ձախորդ օրերը», Առնո Բաբաջանյանի «Չքնաղ երազ», Ալեքսեյ Հեքիմյանի «Բարի արագիլ» և այլն։
Մաթևոսյանը նաև նկարահանվել է մի շարք ֆիլմերում՝ «Եռանկյունի», «Սայաթ-Նովա», «Ով կոտրեց ձայնասկավառակը», «Մեր բակը»։