ԵՐԵՎԱՆ, 8 հունվարի - Sputnik. Ռուսաստանի խաղաղապահների ներկայությունն Արցախում պետք է իրավական հիմնավորում ունենա՝ եռակողմ համաձայնագիր կամ խաղաղապահ առաքելություն իրականացնելու մանդատ։ Այս մասին տելեգրամ-ալիքում գրել է Վատիկանում ՀՀ նախկին դեսպան Միքայել Մինասյանը։
«Ռուսաստանյան կողմն այն պատրաստել է դեռ մինչև նոյեմբերի 9-ը, ու հայկական կողմը պատրաստակամությամբ ստորագրել է, սակայն չի ստորագրել Ադրբեջանը։ Ադրբեջանական կողմը ելնում է նրանից, որ ինքը հաղթող է, Փաշինյանը՝ պարտված, ու առաջ է քաշում 3 լրացուցիչ կետ, որոնք ցանկանում է տեսնել խաղաղապահների գործունեությունը կարգավորող պայմանագրում (կամ դրա մասում)»,- գրել է Մինասյանը։
Ըստ նրա՝ այդ կետերն են.
- Արցախում որևէ հայկական զորք չպետք է լինի, քանի որ այն ադրբեջանական տարածք է։ Ադրբեջանական զորքն այնտեղ է իրավունքի ուժով, ռուսաստանյան զորքը՝ ադրբեջանցիների համաձայնությամբ, իսկ հայկական զորք չպետք է լինի՝ ոչ ՀՀ ԶՈւ, ոչ Արցախի ՊԲ,
Միքայել Մինասյանը մտավորականներին կոչ է անում չվախենալ քաղաքական պահանջներից
- Հայաստանի պաշտոնատար անձանց բոլոր այցերն Արցախ պետք է ինչ-որ կերպ համաձայնեցվեն ադրբեջանական կողմի հետ,
- Արցախի ինքնակառավարման մարմինները պետք է ընտրվեն/նշանակվեն ադրբեջանական կողմի ու խաղաղապահների համաձայնությամբ։
«Հայկական կողմի խնդիրն այն է, որ պարտվողական ոգևորության մեջ նա առաջինն է ստորագրել փաստաթուղթը՝ հնարավորություն չտալով Ադրբեջանին իր ակնկալիքները վերջնականապես ներկայացնել միջնորդին՝ Ռուսաստանին։
Ադրբեջանի հետ չհամաձայնեցված, բայց Նիկոլի կողմից արդեն ստորագրված պայմանագրի նախագիծը Ադրբեջանին բանակցային նոր լծակներ է տալիս՝ թույլ տալով, կետերը չկատարելու դեպքում, պահանջել խաղաղապահների դուրս բերումը»,-նշված է գրառման մեջ։
Մինասյանը վերջում հավելել է, որ հունվարի 11-ին ոչ թե այդ, այլ բոլորովին ուրիշ փաստաթուղթ է քննարկվելու։
Հավելենք, որ ոչ պաշտոնական տվյալներով՝ հունվարի 11-ին Մոսկվայում Նիկոլ Փաշինյանը պետք է հանդիպի Ադրբեջանի նախագահի հետ։