ԵՐԵՎԱՆ, 6 հունվարի - Sputnik. ՀՀ ԱԺ «Լուսավոր Հայաստան» խմբակցության ղեկավար Էդմոն Մարությանը պատասխանել է հարցին, թե ինչպես կլուծեր Շուռնուխի և Որոտանի խնդիրը, եթե լիներ վարչապետ։
Նա նշել է, որ իրեն հաճախ հարցնում են, թե ինչ քայլեր կձեռնարկեր, եթե ստեղծված իրավիճակում լինեի Հայաստանի բանակցողը, մասնավորապես՝ ինչպես կբանակցեր Շուռնուխի և Որոտանի տարածքները չհանձնելու հարցով։
«Պատասխանեմ. նույն «Google»-ի քարտեզով Երասխի հատվածը ՀՀ միջազգայնորեն ճանաչված տարածք է։ Այդ քարտեզի համաձայն էլ՝ Սևակավանի մոտ տարիներ շարունակ տեղակայված են ադրբեջանական մարտական դիրքեր՝ 1.5-2 կմ ներս դեպի Հայաստանի միջազգայնորեն ճանաչված տարածք։ Եվ այս մասին տեղյակ լինելով՝ հայկական կողմը երբեք չի պահանջել Ադրբեջանից այդ մի քանի կմ-ը ետ քաշվել ու դուրս գալ մեր տարածքից, իսկ կառուցված մարտական դիրքերը թողնել մեզ։
Այս պահին այս հարցով մեր հանդուրժողականության դիմաց ես, որպես երկրի վարչապետ, կպահանջեի հօգուտ մեզ փակել Շուռնուխի և Որոտանի տարածքների վեճը՝ ցույց տալով, թե դեռևս տարիներ առաջ որքան է ադրբեջանական կողմը առաջ եկել դեպի մեր տարածք ու իր մարտական դիրքերը դրել, նստել դեպի Սևակավան՝ ընդդեմ մեր մարտական հենակետերի»,–գրել է նա ֆեյսբուքյան էջում։
Մարուքյանի խոսքով`պետք է նկատի ունենալ, որ Շուռնուխում հանձնվող այն տարածքը, որը զբաղեցված է 12 տներով, անգամներով պակաս է քարտեզում ընդգծված տարածքից։
«Այստեղ հրապարակված քարտեզում Ադրբեջանն ունի ամուր կառուցված դիրքեր, որոնք, համոզված եմ, կնախընտրեր պահպանել։ Իմ առաջարկը կլիներ մի կողմ դնել քարտեզները, որոնցից որևէ մեկի բացարձակ ճշգրտության վերաբերյալ չենք կարող վստահ լինել, և առաջնորդվել փոխզիջումային սկզբունքով, ինչպես օրինակ վերը նշեցի»,– գրել է պատգամավորը։
Նրա խոսքով` իշխանությունն ընտրել է «ինչ ուզեն՝ պիտի տանք» սկզբունքը՝ առանց խորամուխ լինելու, թե բանակցային ինչ հնարավորություններ կան և կարող են լինել։
Մարությանի համոզմամբ`ակնհայտ է, որ «պարտության սիմվոլ վարչապետը» չի կարողանում վերոնշված խնդիրները կարգավորել, իսկ եթե ձևը ցույց տալուց հետո էլ չի կարողանալու կարգավորել, նրան կրկին մնում է մեկ տարբերակ՝ մի կողմ քաշվել և թույլ տալ, որ իշխանության գան նրանք, ովքեր կարող են կարգավորել այդ խնդիրները։
Ադրբեջանցիները մտել են Որոտանի տարածք. Գորիսի փոխքաղաքապետը մանրամասներ է պատմում