Սյունիքի մարզի Շուռնուխի գյուղապետ Հակոբ Արշակյանի փոխանցմամբ`Շուռնուխ գյուղի ներքևի հատվածի բնակիչներն արդեն տարհանվել են։ Նրանք վերցրել են իրենց իրերը, ապրուստի միջոցներն ու դուրս եկել այդ տներից։ Ըստ գյուղապետի` այժմ ռուս խաղաղապահների մասնակցությամբ հայերի ու ադրբեջանցիների միջև ընթանում են բանակցություններ, թե որտեղ պետք է կանգնեն սահմանապահները։
«Տարհանված մարդիկ հիմնականում տեղավորվել են գյուղի մյուս հատվածների տներում, նրանց մի մասն էլ մեկնել են Գորիս և Կապան։ Բանակցությունների արդյունքում վերջնականապես կերևա, թե որտեղով է անցնելու սահմանը։ Մենք ցույց ենք տվել նախկինում եղած քարտեզները, որոնցում Շուռնուխ գյուղն ամբողջությամբ գտնվում էր Հայաստանի կազմում, սակայն ինձ ասացին, որ դա իմ որոշելիքը չի, ոչ էլ հայ սահմանապահինը, ամեն ինչ արդեն որոշված է»,– նշեց Շուռնուխի գյուղապետը։
Նրա խոսքով` իրենց ասել են, որ սահմանը գծվել է GPS համակարգով, որը ցույց է տալիս, որ գյուղի ներքևի հատվածը պատկանում է Ադրբեջանին։ Ըստ նրա` թեև Շուռնուխի բնակիչները մի փոքր շփոթված են, սակայն տրամադրված են մարտականորեն։
«Այնպես չէ, որ մենք համակերպվել ենք գյուղի ներքևի հատվածի կորստի հետ։ Բոլոր փաստաթղթերի մասին պետք է բարձրաձայնենք»,– նշեց գյուղապետը։
Ըստ նրա` պատգամավորները պետք է պատրաստ լինեն հետագա զարգացումներին, որովհետև քաղաքական խաղեր տալու ժամանակն անցել է, պետք է քարտեզներով ապացուցենք, որ տարածքը մերն է։
Արշակյանը հունվարի 2-ին Facebook-ի ուղիղ եթերում հայտնեց, որ ադրբեջանցիները մտել են Շուռնուխ։
«Ժողովուրդ ջան, ամեն ինչ պրծավ, թուրքերը եկան։ Մնում է միայն` այս համազգեստը հանենք: Գյուղի մեջ արդեն «պոստ» են ստեղծել, մինչև ամսի 5-ը ժամանակ են տվել, դրանից հետո այստեղ մի հոգի էլ պիտի չմնա, անասունն անցնի՝ իրենցն է, մարդն անցնի՝ իրենցն է»,– հայտարարեց նա։
Հիշեցնենք` ՀՀ պաշտպանության նախարարությունը դեկտեմբերի 20–ին տեղեկացրել էր, որ Սյունիքի մարզի Գորիս-Կապան ավտոճանապարհի 21 կիլոմետրանոց հատվածի վիճարկելի որոշ տեղերում կտեղակայվեն ռուս սահմանապահ ուժեր։
Մասնավորապես, դրանք կտեղակայվեն Գորիս-Դավիթ Բեկ ճանապարհային հատվածում և Գորիս-Կապան ավտոճանապարհի 21 կմ երկարությամբ հատվածում։ Նշված ճանապարհահատվածի անվտանգությունն ապահովելու նպատակով ձեռնարկվելու են անհրաժեշտ համալիր միջոցառումներ:
Դեկտեմբերի 24-ին ՀՀ կառավարության նիստում ՀՀ վարչապետ Նիկոլ Փաշինյանը հայտարարեց, որ այն, ինչ իրականացվում է Սյունիքի սահմաններին, չի կարելի համարել համարել դեմարկացիա կամ դելիմիտացիա։ Նրա խոսքով` տեղի է ունենում սահմանային որոշակի կետերի տեղորոշում, որի նպատակն է անվտանգության ապահովումը։
Դեկտեմբերի 29–ին ադրբեջանցիները Շուռնուխի բնակիչներին 1 օր ժամանակ էին տվել գյուղի կեսը, այսինքն 12 տները ազատելու համար։ Շուռնուխի գյուղապետ Հակոբ Արշակյանը Sputnik Արմենիայի հետ զրույցում ասել էր, որ այդ մեկօրյա ժամկետը Մոսկվայի միջամտությամբ վերացել է։
Նա նշել էր, որ տոների հետ կապված մինչև հունվարի 2-3-ը մարդիկ կմնան իրենց տներում։ Հետո ինչ կլինի` պարզ չէ։
Մարզպետարանը խոստացել էր տրանսպորտ տրամադրել գյուղացիներին, ինչպես նաև տների համար դրամական փոխհատուցումներ տալ։
Ի դեպ, նաև գյուղապետի տունն է մտնում հանձնվող 12 տների մեջ։ Նա այդ տանը վերաբնակվել է 1992 թվականին, լիովին վերակառուցել այն, այգիներ ու բոստաններ ստեղծել։