ԵՐԵՎԱՆ, 1 հունվարի – Sputnik. Առեղծվածային մոնոլիտը, որն ավելի վաղ հայտնաբերվել էր մի շարք երկրներում, հայտնվել է բրիտանական Սոլսբերիի մոտ։ Հայտնում է ՌԻԱ Նովոստին` հղում անելով ITV News հեռուստաալիքը:
Ուիլթշիրի կոմսությունում շուրջ 2,4 մետր բարձրությամբ մոնոլիտը նկատել են առավոտյան։ Եռակողմ կառույցն ունի հայելային մակերևույթ։ Կողմերից մեկում անհայտ անձինք թողել են գրություն. «Շնորհավոր Ամանոր»։
Թե ինչպես է մոնոլիտը հայտնվել Սոլսբերիի մոտ և ով է այնտեղ թողել այն` դեռ հայտնի չէ։
Ավելի վաղ մի քանի շողշողացող մոնոլիտներ են հայտնաբերվել Գերմանիայում, Նիդեռլանդներում, ԱՄՆ-ում, Ռումինիայում, Մեծ Բրիտանիայում և Բոլիվիայում: Բացի այդ, Իսպանիայում էին հայտնաբերել մոնոլիտ, որը, սակայն, արդեն ընկել է։
Մոնոլիտների հետ կապված պատմությունը մեծ աղմուկ էր բարձրացրել սոցիալական ցանցերում։ Օգտատերերից ոմանք կարծում են, թե դրանք սովորական արտ-օբյեկտներ են։ Ուրիշները դավադրության տեսություններ են կառուցում և վստահեցնում, որ դա այլմոլորակայինների ձեռքի գործն է։ Սյուները մոնոլիտ են անվանում, քանի որ դրանք նման են ռեժիսոր Սթենլի Կուբրիկի «2001. տիեզերական ոդիսական» ֆիլմում ցուցադրված օբյեկտներին։
Sputnik Արմենիայի հետ զրույցում երկրաբանական գիտությունների թեկնածու, Էկոլոգիայի, մարդու անվտանգության և բնության միջազգային ակադեմիայի հայկական բաժանմունքի նախագահ Հայկ Մելիք-Ադամյանը հայտնել էր` աշխարհի որոշ երկրներում հայտնաբերված մոնոլիտ սյուները ոչ այլ ինչ են, քան սովորական արվեստի օբյեկտներ։