ԵՐԵՎԱՆ, 29 դեկտեմբերի- Sputnik. Սյունիքի մարզի Շուռնուխ գյուղի բնակիչներն ավտոմեքենաներով փակել են ճանապարհը։ Շուռնուխի գյուղապետ Հակոբ Արշակյանը Facebook-ի ուղիղ եթերում ցույց է տվել փակած ճանապարհը և կոչ արել մարդկանց միանալ։
Ադրբեջանցիները պահանջել են մեկ օրում ազատել Շուռնուխ գյուղի կեսը. Գորիսի փոխքաղաքապետ
«Թուրքի ներկայացուցիչը հայտարարություն է արել, որ 12 տների բնակիչներ պետք է լքեն իրենց տները։ Տղերք ջան, ում մոտ զենք կա, եկեք, հողը պահենք։ Իրանք իրանց GPS-ով «ռուլիտ» անում։ Իսկ քարտեզը մերն է, ոնց էլ նայես», – ասում է Արշակյանը։
Գյուղապետը պահանջում է, որ այն պաշտոնյան, որին 10 օր առաջ տեղյակ են պահել, թե գյուղի կեսը պետք է հանձնվի Ադրբեջանին, գա գյուղացիների մոտ և բացատրի` ինչու է լռել։
Ավելի վաղ Sputnik Արմենիայի հետ զրույցում Գորիսի փոխքաղաքապետ Մենուա Հովսեփյանն ասել էր, որ ադրբեջանցիների խոսքով` ՀՀ իշխանությունները արդեն տասը օր պետք է տեղյակ պահեին շուռնուխցիներին, որ գյուղի կեսը հանձնվում է։ Սակայն ո՛չ գյուղի բնակիչները, ո՛չ համայնքային իշխանությունները տեղյակ չեն եղել։