Երևան, 29 դեկտեմբերի-Sputnik. Հայրենիքի փրկության շարժումը Երևանի Արաբկիր համայնքում երթ անելուց հետո գնաց ՀՀ հատուկ քննչական ծառայության շենքի մոտ` մի շարք պահանջներ ներկայացնելու։
«Իրավապահ համակարգը պետք է նախևառաջ հարգանքով վերաբերվի քաղաքացիներին, նոր միայն պահանջի նույնը իր հանդեպ։ Բայց ինչ հարգանքի մասին է խոսքը, երբ կատարվում են անօրինական քրեական հետապնդումներ, առևանգում են մարդկանց, ամեն ձևով փորձում են խոչընդոտել հայրենիքի պաշտպանության դիրքերում կանգնած մարդկանց», – ՀՔԾ–ի դիմաց ասաց ՀՅԴ ներկայացուցիչ Արծվիկ Մինասյանը։
Ընդդիմադիրները պահանջում են քրեական գործ հարուցել վարչապետ Նիկոլ Փաշինյանի դեմ, պատասխանատվության կանչել նաև ՊՊԾ նորանշանակ պետ Սարգիս Հովհաննիսյանին, ԱԺ պատգամավոր Սիսակ Գաբրիելյանին և ոստիկանության մի շարք աշխատողների։
Հիշեցնենք, որ երեկ Հովհաննիսյանի և Գաբրիելյանի մասնակցությամբ ծեծկռտուք է տեղի ունեցել։ Գաբրիելյանը դուրս է եկել իր մեքենայի ճանապարհը փակած ընդդիմադիրների մոտ և հարվածել նրանց, հետո ծեծին միացել է նաև Հովհաննիսյանը։
Հայաստանում բողոքի ակցիաները՝ վարչապետի հրաժարականի պահանջով, սկսվել են նոյեմբերի 9-ին Արցախում հրադադար հաստատելու վերաբերյալ եռակողմ հայտարարության ստորագրումից հետո։
Ընդդիմադիր կուսակցությունների նախաձեռնությամբ ստեղծվել է Հայրենիքի փրկության շարժում, որը վարչապետի միասնական թեկնածու ունի` Հանրային խորհրդի նախկին նախագահ Վազգեն Մանուկյանը։
Դեկտեմբերի 22–ի լույս 23–ի գիշերն ընդդիմադիրները լուսացրին Հանրապետության հրապարակում խփած վրաններում։ Նրանք վրաններում են անցկացրել նաև այս գիշեր։
Մոր և մանկան կենտրոնը միանալու է Փաշինյանի հրաժարականի պահանջով գործադուլին