ԵՐԵՎԱՆ, 28 դեկտեմբերի – Sputnik. Ազգային ժողովի «Իմ քայլը» խմբակցության` լիազորությունները դադարեցրած պատգամավորներ Արգիշտի Մեխակյանին, Արամ Խաչատրյանին ու Երջանիկ Հակոբյանին այսուհետ կփոխարինեն «Իմ քայլը» դաշինքի նախընտրական ցուցակի հաջորդ երեք թեկնածուները՝ Կարեն Գրիգորյանը, Վանիկ Օհանյանն ու Հակոբ Ասլանյանը:
ԱԺ կազմը համալրած նոր պատգամավորներն այսօր խորհրդարանի արտահերթ նիստում պատգամավորական երդում տվեցին. «Բարեխղճորեն կատարել ՀՀ ժողովրդի առաջ ստանձնած պարտավորությունները, պահպանել ՀՀ Սահմանադրությունն ու օրենքները, նպաստել ՀՀ ինքնիշխանության և շահերի պահպանմանը, անել ամեն ինչ՝ քաղաքացիական համերաշխության ու համամարդկային արժեքների պահպանման համար»:
Հիշեցնենք՝ Արամ Խաչատրյանը դեկտեմբերի 17-ին նշանակվել է Լոռու մարզպետ, Արգիշտի Մեխակյանը, որն արցախյան պատերազմի լեգենդար հրամանատար Մեխակ Մեխակյանի որդին է, նշանակվել է Արմավիրի մարզպետի տեղակալ, Երջանիկ Հակոբյանը վերադարձել է իր նախկին աշխատանքին ՊԵԿ համակարգում: