ԵՐԵՎԱՆ, 26 դեկտեմբերի – Sputnik. Պետք էր, որ ընդդիմադիր 17 կուսակցությունները վերջապես հասկանային, որ իրենք այս երկրում քաղաքական օրակարգ ստեղծող ու պարտադրող չեն, որ չունեն ժողովրդի զգալի մասի աջակցությունը։ Facebook սոցցանցի իր էջում նման գրառում է արել «Քաղաքացիական պայմանագրի» հանրային կապերի համակարգող Վահագն Ալեքսանյանը։
«Շատ կարևոր էր թողնել, որ 17+ -ն ինքնարտահայտվեն, որպեսզի ցույց տան իրենց ողջ կարողությունները, որ փորձեն շրջափակել կառավարության մեկ շենքը միայն ու չկարողանան մարդկանց սակավության պատճառով։ Պետք էր թույլ տալ, որ 2 հազար հոգանոց հավաքներ անեն Հանրապետության հրապարակում»,–գրել է նա։
Ալեքսանյանի խոսքով` այս ամենը տեսան ու արձանագրեցին բոլորը։ Իսկ հիմա առողջ ուժերը լծվելու են արտահերթ ընտրություններին պատրաստվելու, ծրագիր կազմելու ու ներկայացնելու գործին, իսկ 17-ը կմնան նույն թմբիրում։ Լրիվ ու բացարձակապես նույն թմբիրում, որտեղ, ըստ Ալեքսանյանի, որոշողն իրենք են և ոչ ժողովուրդը։
Հիշեցնենք, որ ընդդիմադիր կուսակցությունները միավորվել և պահանջում են վարչապետ Նիկոլ Փաշինյանի հրաժարականը։ Ռուսաստանի, Հայաստանի և Ադրբեջանի առաջնորդների` նոյեմբերի 9-ին ստորագրած եռակողմ հայտարարությունից հետո նրանք գրեթե ամեն օր անհնազանդության ակցիաներ և հանրահավաքներ են իրականացնում։
«Քո փորձերը չեն ստացվելու». Սաղաթելյանն արձագանքել է Փաշինյանին
Երեկ Փաշինյանը ֆեյսբուքյան իր էջում գրառում էր արել` նշելով, որ առկա բոլոր հարցադրումների պատասխանը ստանալու միայն մի տարբերակ կա՝ խորհրդարանական արտահերթ ընտրությունների անցկացում։ Նա քաղաքական ուժերին հրավիրել է խորհրդակցությունների` 2021 թվականին արտահերթ խորհրդարանական ընտրություններ անցկացնելու հարցով։