Հայաստանում տնտեսության ցուցանիշները բավականին մտահոգիչ են։ Ակնհայտ է, որ 2021 թվականը դիմավորում ենք շատ վատ մեկնարկային պայմաններով. մոտավոր հաշվարկով 2020-ին կունենանք 10 տոկոսանոց տնտեսական անկում, ինչը երկրում շատ լուրջ սոցիալական խնդիրներ կառաջացնի։ Sputnik Արմենիայի հետ զրույցում նման կարծիք հայտնեց տնտեսագետ Կառլեն Խաչատրյանը։
«2020 թվականը տնտեսական առումով շատ ծանր տարի էր. համավարակի պատճառով կտրուկ անկումը մարտ-մայիս ամիսներին, հետո էլ պատերազմով պայմանավորված նվազումները, հետպատերազմյան շրջանում էլ նկատում ենք գնողունակության նվազում ու բացասական որոշակի սպասելիքներ, որոնք ուղղակիորեն հանգեցնելու են շատ վատ ցուցանիշների»,- ասաց նա։
Կառլեն Խաչատրյանի խոսքով` ստեղծված իրավիճակում ներդրումների մասին խոսելը ֆանտաստիկայի ժանրից է։ Համավարակին ու հետպատերազմյան ճգնաժամին գումարվել է նաև ներքաղաքական անկայունությունը։
«Անվտանգային բաղադրիչը ներդրումների խթանման, ներդրումների հարցում շատ առաջնային, եթե չասենք ամենակարևոր բաղադրիչն է, ու ոչ միայն հարևան երկրների հետ թշնամական հարաբերությունները, այլև երկրի ներսում ներքաղաքական անկայունությունն ուղղակիորեն ազդելու է ներդրումային միջավայրի վրա»,- նշեց Խաչատրյանը։
Մարդիկ սկսել են քիչ ծախսել. ինչպես են համավարակն ու պատերազմն ազդել տնտեսության վրա
Տնտեսագետը ողջունում է ԱԺ տնտեսական հանձնաժողովում այսօր քննարկված նախագիծը, որը նպատակ ունի թեթևացնել ներդրողների հարկային բեռը, սակայն, ըստ նրա, առանձին քայլերով հնարավոր չէ ներդրումային գրավչությունն ավելացնել։
«Պետք է սթափ նայենք իրավիճակին. մեկ քայլով անհնար է մեր ներդրումային գրավչության խնդիրը լուծել, կամ այդ մեկ քայլը բավարար չի լինելու, որ բիզնեսն ակտիվորեն ներդրումներ կատարի և տնտեսությունը սկսի արմատական զարգացման ուղիով գնալ»,- ընդգծեց տնտեսագետը։
Խաչատրյանի համոզմամբ` նախևառաջ պետք է մշակել տնտեսության զարգացման երկարաժամկետ տեսլական, մանավանդ այն դեպքում, երբ տնտեսության գրեթե բոլոր ոլորտներում ունենք անկումային միտում։ Ճգնաժամն էլ ավելի չխորացնելու համար պետությունը պետք է ակտիվորեն միջամտի և ոչ թե հուսա, որ այն կվերականգնվի իներցիոն ճանապարհով։
Հիշեցնենք` ԱԺ տնտեսական հարցերի մշտական հանձնաժողովը հավանություն է տվել Հարկային օրենսգրքում փոփոխությունների նախագծին, որով նախատեսվում է այս տարվա հուլիս-դեկտեմբեր ամիսներին գործարարների համար սահմանված արտոնությունները երկարաձգել մինչև 2021 թվականի դեկտեմբերի 31-ը, այն է` ներմուծվող կամ ձեռք բերվող, մշակվող հիմնական միջոցների ամորտիզացիոն նվազագույն ժամկետը սահմանել ռեզիդենտ շահութահարկ վճարողի և մշտական հաստատության միջոցով Հայաստանում գործունեություն իրականացնող ոչ ռեզիդենտ շահութահարկ վճարողի հայեցողությամբ։
Ինքնահոսի մատնված երկիր, կամ պատերազմող Հայաստանում որևէ հրահանգ տնտեսությունը չի ստացել