ԵՐԵՎԱՆ, 22 դեկտեմբերի – Sputnik. Ոստիկանությունը պարզաբանում է տարածել` հայտնելով, որ Ոստիկանության զորքերի հրամանատարի տեղակալ Սամվել Հակոբյանը ծառայությունից այլ պատճառներով է ազատվել։
ՀՅԴ ներկայացուցիչ Գեղամ Մանուկյանն այսօր Հանրապետության հրապարակում ընթացող հանրահավաքի ժամանակ հայտարարել էր, որ ՀՀ ոստիկանության զորքերի հրամանատարի տեղակալ, գնդապետ Սամվել Հակոբյանը և ՀՀ ոստիկանության ՊՊԾ գնդի կարմիր բերետների գումարտակի հրամանատարի տեղակալ Խաչատուր Թովմասյանը հրաժարականի դիմումներ են ներկայացրել։ Մանուկյանը հայտարարել էր, որ միայն քաղաքական ուժերը չէ, որ պահանջում են Նիկոլ Փաշինյանի հրաժարականը։
«Այսօր հանրահավաքում հայտարարվել է, որ Սամվել Հակոբյանը ծառայությունից ազատվելու զեկուցագիր է ներկայացրել։ Հայտնում ենք, որ այդ քայլի պատճառները, որոնք ներկայացվել են հանրությանը, չեն համապատասխանում իրականությանը։ Հակոբյանը պաշտոնավարումը դադարեցրել է ծառայողական հարաբերություններում ծագած խնդիրների պատճառով»,–նշված է ոստիկանության հաղորդագրության մեջ։
Հիշեցնենք` այսօր Երևանի Հանրապետության հրապարակում մեկնարկել է ՀՀ վարչապետ Նիկոլ Փաշինյանի հրաժարականը պահանջող անհնազանդության ակցիան։ Բացի բողոքի ակցիաններից, այսօր իրականացվում են նաև դասադուլներ և գործադուլներ։
Բազմամարդ ակցիայի ընթացքում հնչում են «Նիկոլ, հեռացիր», «Նիկոլ, դավաճան», «Առանց Նիկոլ Հայաստան» կոչերը, ծածանվում է եռագույնը։ Ժամանակ առ ժամանակ լսվում է հասարակական գործիչ Ռուբեն Մխիթարյանի` վերջերս հեղինակած «Իմ Արցախ, իմ հող ու ջուր, իմ Հայաստան» երգը: