ԵՐԵՎԱՆ, 22 դեկտեմբերի – Sputnik. ՀՀ վարչապետ Նիկոլ Փաշինյանը Facebook–ի իր էջում հրապարակել է 2010 թվականին ընդունված այն օրենքը, որում ներկայացված է Գեղարքունիքի մարզի Սոթք գյուղի սահմանագծերի նկարագրությունը։
«Սա էլ Գեղարքունիքի մարզի Սոթք գյուղի սահմանագծերի նկարագրությունը՝ 2010 թվականին ընդունված ՀՀ վարչատարածքային բաժանման մասին օրենքով։ Այսօր մեր զինված ուժերը տեղակայված են այս նկարագրությամբ։ Հիշեցնեմ՝ 2010 թվականին օրենքին կողմ են քվեարկել ՀՀԿ, ԲՀԿ, ՀՅԴ խմբակցությունները։ Օրենքի նախագիծը ներկայացրել է կառավարությունը։
Կողմ քվեարկած պատգամավորներից և նախարարներից շատերը մեզ մեղադրում են և այսօր էլ կմեղադրեն Քելբաջարը հանձնելու մեջ, չնայած օրենք են ընդունել, որ այն Ադրբեջանի մաս է, կմեղադրեն Սոթքի հանքի համար չնայած օրենքով նկարագրել են այն, ինչ այսօր ունենք»,– լուսանկարներին կից գրել է Փաշինյանը։
Հիշեցնենք` ՀՀ վարչապետն այս օրենքի մասին խոսել էր նաև երեկ Սիսիանում։
ՀՀ «Վարչատարածքային բաժանման մասին» օրենքը, որը հիշատակում է Փաշինյանը, 2010թ–ին ոչ թե ընդունվել է, այլ լրացումների ու փոփոխությունների ենթարկվել։ Բուն օրենքն ընդունվել է 1995թ–ի նոյեմբերի 7–ին։
Ընդ որում` դրանում Սյունիքի, Վայոց Ձորի, Գեղարքունիքի ու Տավուշի մարզերի մի շարք բնակավայրեր, այդ թվում` Փաշինյանի հիշատակած Սյունիքի Տեղ գյուղն արդեն իսկ ներկայացված են որպես Ադրբեջանին սահմանամերձ։
Ինչ վերաբերում է վարչապետի հիշատակած օրենքի փոփոխություններին, այդ նախագիծը խորհրդարան է ներկայացվել 2009թ–ի դեկտեմբերի 8-ին։ 2010թ–ի ապրիլին ընդգրկվել է նստաշրջանի օրակարգ, ապրիլի 29–ին օրենքն արդեն ընդունվել է առաջին ընթերցմամբ, հունիսի 24-ին` երկրորդ ընթերցմամբ և ամբողջությամբ։
Որքա՞ն կտևի պատերազմի բացասական ազդեցությունը. Թևիկյանը` Սոթքի հանքավայրի մասին
Նշենք, որ օրենքին կողմ է քվեարկել ԱԺ 77 պատգամավոր, դեմ`5, ձեռնպահ`2։ Դեմ քվեարկողներն են ՀՀԿ–ից Հակոբ Հակոբյանը, Վիկտոր Դալլաքյանը, «Ժառանգությունից»` Անահիտ Բախշյանը, Ստյոպա Սաֆարյանն ու Արմեն Մարտիրոսյանը։
Օրենքը հեղինակել է ՀՀ կառավարությանն առընթեր Անշարժ գույքի կադաստրի կոմիտեն։ Նախագիծը հիմնական զեկուցմամբ ԱԺ–ում ներկայացրել է կադաստրի կոմիտեի նախագահի տեղակալ Աշոտ Մուսայանը։
Խորհրդարանի ընդունած օրենքը ՀՀ նախագահ Սերժ Սարգսյանը ստորագրել է 2010թ–ի հուլիսի 14–ին։
Սոթքի հանքավայրի վարչական շենքը գտնվում է հայկական կողմում. Տիգրան Ավինյան