ԵՐԵՎԱՆ, 20 դեկտեմբերի - Sputnik. ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը Facebook–ի իր էջում հրապարակել է մի տեսանյութ, որտեղ երևում է, թե Սյունիքում ինչպես են ադրբեջանական դրոշով մի խումբ զինծառայողներ կանգնած ավտոճանապարհին։
«Հայաստանի ինքնիշխան հանրապետություն, Սյունիք, Որոտան գյուղի մատույց, հենց այս պահին՝ ադրբեջանցի զինվորներ», - գրել է Զոհրաբյանը։
Նշենք, որ համաձայն Google քարտեզի՝ տեսանյութը արված է Գորիսից Որոտան ավտոճանապարհի 4-րդ կմ-ի վրա, որտեղ ճանապարհը մտնում է Խորհրդային Ադրբեջանի տարածք։
Նշենք, որ նախօրոք Sputnik Արմենիայի թղթակիցները անցել են այդ ճանապարհով և տեսել, որ հայկական կողմում ՀՀ ԱԱԾ աշխատակիցներ են տեղակայված։
Սա Ադրբեջանի հետ սահմանին ճանապարհի միակ խնդրահարույց հատվածը չէ։ Նույն իրավիճակն է նաև Շուռնուխ և Դավիթ Բեկ գյուղերի, ինչպես նաև Կապանից հարավ ընկած հատվածում։
Դեկտեմբերի 19–ի տեսաուղերձում ՀՀ վարչապետ Նիկոլ Փաշինյանը հայտարարել էր, որ Սյունիքի մարզում այս պահին սահմանների ճշգրտում է տեղի ունենում, ՀՀ սահմանապահ ուժերը տեղակայվում են ՀՀ միջազգայնորեն ճանաչված սահմաններին։
Ռուս սահմանապահներ են տեղակայվել Գորիս-Կապան ու Գորիս-Դավիթ Բեկ ճանապարհներին։