ԵՐԵՎԱՆ, 19 դեկտեմբերի - Sputnik. Սյունիքի մարզում այս պահին սահմանների ճշգրտում է տեղի ունենում, ՀՀ սահմանապահ ուժերը տեղակայվում են ՀՀ միջազգայնորեն ճանաչված սահմաններին։ Այս մասին այսօր իր տեսաուղերձում ասաց ՀՀ վարչապետ Նիկոլ Փաշինյանը` անդրադառնալով Սյունիքի մարզում վերջին օրերին տիրող լարված իրավիճակին։
«Սա որոշակի փոփոխություններ է բերում մեզ ծանոթ միջավայրում, ստեղծում բարդություններ ու անհարմարություններ, ստեղծում որոշակի էմոցիաներ։ Ու նույնիսկ գնահատականներ են հնչում, թե տեղի ունեցողը Սյունիքի հանձնում է ու սպառնում է Սյունիքի կորստով»,– ասաց Փաշինյանը։
Նրա խոսքով` իրականությունը ճիշտ հակառակն է` ամեն ինչ արվում է Սյունիքի անվտանգությունը երաշխավորելու ու այդ երաշխիքներն ամրապնդելու համար։
«Խնդիրն այն է, որ Հայաստանի` միջազգայնորեն ճանաչված սահմաններին վերջին օրերին ռազմական գործողությունների վերսկսման մեծ հավանականություն կա, և եթե այդ էսկալացիան տեղի ունենար նշված հատվածում, ալիքով կարող էր տեղափոխվել Սյունիքի մարզ, ՀՀ տարածք`սրանից բխող հետևանքներով»,– ասաց նա` շեշտելով, որ տեղակայվելով Սյունիքի սահմաններին, Հայաստանը լրացուցիչ անվտանգության երաշխիք է ստեղծում իր համար։
«Այսօրվա սահմանն արդեն անվտանգային այն համակարգի (ՀԱՊԿ,–խմբ.) սահմանն է, որի անդամն ենք մենք, և որտեղ արդեն անվտանգային բոլորովին այլ կանոններ են գործում։ Այսօր արդեն ՌԴ սահմանապահ զորքերը և այլ ուժեր լիարժեք ներգրավված են Սյունիքում, և սա անվտանգային առումով բոլորովին այլ իրավիճակ է ստեղծում»,– ասաց վարչապետը։
Փաշինյանը հաստատեց, որ Սյունիքի ճանապարհներին այս գործընթացի արդյունքում կարող են որոշակի դժվարություններ ծագել։ Բայց, սա, նրա խոսքով, լուծելի հարց է ու այդ ուղղությամբ ջանքեր են գործադրվում։
Ադրբեջանական զինուժն ընդհուպ մոտեցել է Սյունիքի մարզի Շուռնուխ գյուղին
Նա նաև հայտարարեց, որ Սյունիքի մարզի ու ՀՀ տարածքից ոչ մի միլիմետր հող չի զիջվել։
Փաշինյանը վերահաստատեց իր երեկվա հայտարարությունն այն մասին, որ երեքշաբթի` դեկտեմբերի 22-ին, պատրաստվում է մեկնել Սյունիք ու հույս հայտնեց, որ կկարողանա փարատել սյունեցիների բոլոր մտավախությունները։
Հիշեցնենք`նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը ռազմական գործողությունների դադարեցման վերաբերյալ համատեղ հայտարարություն ընդունեցին, որի համաձայն` մի շարք տարածքներ փոխանցվեցին Ադրբեջանին։
Դեկտեմբերի 12-ին ԱԽ նիստում ՀՀ վարչապետ Նիկոլ Փաշինյանը հայտարարեց, որ առաջիկայում պետք է որոշումներ կայացվեն Սյունիքին սահմանամերձ Կուբաթլուի ու Զանգելանի շրջանների հետ կապված։ Նա չբացառեց, որ այդ գործընթացի հետևանքով կարող է որոշակի լարվածություն առաջանալ։
Սահմանը քարտեզը չէ, գրիչի ու ֆլոմաստերի գիծը չէ. Սարհատ Պետրոսյան