ԵՐԵՎԱՆ, 18 դեկտեմբերի – Sputnik. Ղարաբաղյան հակամարտության վերաբերյալ նորմալ երկխոսության բացակայությունը հանգեցրեց Արցախի պատերազմին և այդ պատերազմում հայկական կողմի պարտությանը։ Sputnik Արմենիա մուլտիմեդիոն կենտրոնում ասուլիսի ժամանակ նման հայտարարություն արեց «Сегодня.ру» կայքի գլխավոր խմբագիր, ռազմական թղթակից Յուրի Կոտենոկը։
«Այն շրջանները, որոնք ազատագրեցին առաջին պատերազմում, Ստեփանակերտի համար «անվտանգության բարձիկ» էին ծառայում։ Իսկ հակառակ կողմի հետ երկխոսությունը, որի ընթացքում հնարավոր էր քաղաքակիրթ փոխանակում անցկացնել, կբացառեր նոր պատերազմը»,-ասաց Կոտենոկը։
Նրա խոսքով` հայկական կողմը պետք է բանակցություններ վարի «ատամները սեղմած» և ստանա խաղաղապահ զորակազմի աջակցությունը: Խաղաղապահների վրա հարձակումը հարձակում է այլ պետության վրա։
Ընդհանուր առմամբ` Արցախում տեղի ունեցողը նա գնահատում է որպես հայկական կողմի ռազմական պարտություն, որին հանգեցրին մի շարք գործոններ։ Մասնավորապես՝ պաշտպանության հարկ եղած պատրաստություն չէր իրականացվել, չկար հստակ ռազմական կառավարում, ամենուր անկազմակերպված վիճակ էր տիրում։
Կոտենոկը կարծում է, որ հայերն այս առումով հակառակորդից սովորելու շատ բան ունեն, ինչպես նաև պետք է ազատվեն «կոտրված բանակի» բարդույթից։
Ինչ վերաբերում է այսօր երկրի հարավային սահմաններում, ինչպես նաև Արցախում տիրող իրավիճակին, Կոտենոկը նշեց, որ դա իրադարձությունների տրամաբանական շարունակությունն է։
«Ադրբեջանը փորձում է միակողմանի կարգով սահմանազատել տարածքը և գործում է հաղթողի իրավունքով` հայկական կողմի հետ հաշվի չնստելով»,-ասաց Կոտենոկը։
Նա նշեց, որ Ռուսաստանի Անվտանգության դաշնային ծառայության ղեկավարն ամենայն հավանականությամբ Հայաստան է եկել հենց այդ հարցերի լուծման նպատակով։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են