ԵՐԵՎԱՆ, 18 դեկտեմբերի – Sputnik. Հայկական և ադրբեջանական կողմերի միջև գերիների փոխանակումը տեղի կունենա մոտ ապագայում։ Տեղեկությունը ՌԻԱ Նովոստիին է հայտնել Արցախի նախագահի արտաքին քաղաքականության հարցերով խորհրդական Դավիթ Բաբայանը։
«Հստակ ամսաթիվ չեմ կարող նշել, բայց հույս ունեմ, որ այդ իրադարձությունը տեղի կունենա առաջիկա օրերին», - ասել է նա։
Բաբայանը հույս է հայտնել, որ գերիների հաջորդ փոխանակումը տեղի կունենա այս հանգստյան օրերին:
«Տա Աստված, հույս ունեմ։ Սա շատ նուրբ թեմա է, քանի որ հարազատները մշտապես սպասում են: Նրանց համար թանկ է ամեն րոպեն, վայրկյանը։ Այդ պատճառով պետք է իմանալ ճշգրիտ ամսաթիվը, որպեսզի այդ մարդկանց տեղեկացնենք», - ասել է Արցախի նախագահի խորհրդականը։
Նա նաև հայտնել է, որ Հայաստանին փոխանցված գերիների առաջին խմբի մեծ մասն առողջական լուրջ խնդիրներ ունեն:
Հիշեցնենք, որ 44 հայ գերիներին տեղափոխող առաջին ինքնաթիռը «Էրեբունի» օդանավակայանում վայրէջք կատարեց դեկտեմբերի 14-ի գիշերը։ Արդեն դեկտեմբերի 15-ին Ադրբեջանը Հայաստանին փոխանցեց ևս մեկ քաղաքացիական անձի։ Վերադարձել էին այն քաղաքացիները, որոնց գերեվարման փաստը հաստատվել էր Կարմիր խաչի միջազգային կոմիտեի և Բաքվի կողմից։ Նախնական տվյալներով՝ նրանցից 30-ը զինծառայողներ են, 15-ը՝ քաղաքացիական անձիք։
Ավելի ուշ տեղեկություններ տարածվեցին, որ Հադրութի Խծաբերդ գյուղից 150 շիրակցի է գերեվարվել ադրբեջանցիների կողմից։
Արցախի Հանրապետության պաշտպանության բանակի մամուլի ծառայությունը հայտնեց, որ անհայտ պայմաններում կորել է կապը Հադրութի Հին Թաղեր և Խծաբերդ գյուղերի ուղղությամբ տեղակայված ԱՀ ՊԲ մի քանի մարտական դիրքերի անձնակազմի հետ, ողջ գիշեր և այսօր առավոտյան շարունակվել են որոնողական աշխատանքները։ Ռուսական խաղաղապահ զորախմբի միջնորդությամբ գործուն քայլեր են իրականացվում` հայ զինվորականների գերեվարման հավանականությունը պարզելու, դրա հաստատվելու դեպքում անհրաժեշտ գործողություններ ձեռնարկելու համար։
Արցախի ՄԻՊ Արտակ Բեգլարյանն էլ հաստատեց, որ ըստ նախնական տվյալների՝ Հադրութի շրջանի Խծաբերդ գյուղի ուղղությամբ այս օրերին անհետ կորել է շուրջ 60 զինծառայողից բաղկացած մի ստորաբաժանում։
Հետո հայտնի դարձավ, որ ավելի քան 30 հայ կամավորներ կարողացել են դուրս գալ ադրբեջանցիների շրջափակումից։