- ԵՐԵՎԱՆ, 18 դեկտեմբերի – Sputnik.Արցախում նոր զինծառայողների գերեվարման լուրն իրականությանը չի համապատասխանում։ Այս մասին Sputnik Արմենիային հայտնեցին Արցախի պաշտպանության բանակից։
«Վերջին օրերին որևէ գերի չունենք»,– ասաց մեր զրուցակիցը` հավելելով, որ ՊԲ–ն առաջիկայում ավելի ծավալուն մեկնաբանություն կներկայացնի համացանցում հայտնված նոր տեսանյութի մասին։
Նշենք, որ այսօր համացանցում տարածված տեսանյութում ադրբեջանցի զինվորականները հայ զինծառայողների մի քանի տասնյակի հասնող շարք են տանում` նրանց սպառնալով ինքնաձիգով։ Տեսանյութում ադրբեջանցիներից մեկը հայտնում է, որ իրենք ևս 62 հայ են գերեվարել:
Ֆիզուլուց, Ջաբրայիլից և Հադրութից գտել են 35 զինծառայողի աճյուն ու մեկ տարեց կնոջ դիակ
Հիշեցնենք, որ 44 հայ գերիներին տեղափոխող առաջին ինքնաթիռը «Էրեբունի» օդանավակայանում վայրէջք կատարեց դեկտեմբերի 14-ի գիշերը։ Արդեն դեկտեմբերի 15-ին Ադրբեջանը Հայաստանին փոխանցեց ևս մեկ քաղաքացիական անձի։ Վերադարձել էին այն քաղաքացիները, որոնց գերեվարման փաստը հաստատվել էր Կարմիր խաչի միջազգային կոմիտեի և Բաքվի կողմից։ Նախնական տվյալներով՝ նրանցից 30-ը զինծառայողներ են, 15-ը՝ քաղաքացիական անձիք։
Ավելի ուշ տեղեկություններ տարածվեցին, որ Հադրութի Խծաբերդ գյուղից 150 շիրակցի է գերեվարվել ադրբեջանցիների կողմից։
Արցախի Հանրապետության պաշտպանության բանակի մամուլի ծառայությունը հայտնեց, որ անհայտ պայմաններում կորել է կապը Հադրութի Հին Թաղեր և Խծաբերդ գյուղերի ուղղությամբ տեղակայված ԱՀ ՊԲ մի քանի մարտական դիրքերի անձնակազմի հետ, ողջ գիշեր և այսօր առավոտյան շարունակվել են որոնողական աշխատանքները։ Ռուսական խաղաղապահ զորախմբի միջնորդությամբ գործուն քայլեր են իրականացվում` հայ զինվորականների գերեվարման հավանականությունը պարզելու, դրա հաստատվելու դեպքում անհրաժեշտ գործողություններ ձեռնարկելու համար։
Արցախի ՄԻՊ Արտակ Բեգլարյանն էլ հաստատեց, որ ըստ նախնական տվյալների՝ Հադրութի շրջանի Խծաբերդ գյուղի ուղղությամբ այս օրերին անհետ կորել է շուրջ 60 զինծառայողից բաղկացած մի ստորաբաժանում։
Հետո հայտնի դարձավ, որ ավելի քան 30 հայ կամավորներ կարողացել են դուրս գալ ադրբեջանցիների շրջափակումից։