ԵՐԵՎԱՆ, 17 դեկտեմբերի – Sputnik. Սյունիքի մարզպետ Մելիքսեթ Պողոսյանը չկարողացավ համոզել սյունեցիներին, որ բացեն Կապանի օդանավակայանի ճանապարհը։
«Մենք Ձեզ շատ հարգում, սիրում ենք, բայց եթե անգամ ոստիկանությունը մեզ ձերբակալի, ծեծի, կտրատի, մենք այստեղից չենք հեռանալու, քանի դեռ պատասխաններ չենք ստացել»,-ասաց սյունեցիներից մեկը։
Նա հորդորեց մարզպետին անձամբ բանակցել ռուս խաղաղապահների հետ, որպեսզի հարցին լուծում տրվի, քանի որ իրենց մինչև վաղը ժամը 5-ը ժամանակ են տվել դիրքերից իջնելու։
«Մենք այստեղից չենք հեռանալու, տնավորվելու ենք, մնանք էստեղ»,-կատակեց սյունեցին ու ճանապարհեց մարզպետին։
Նշենք, որ մեկ ժամ առաջ Սյունիքի մարզպետն այցելել էր ցուցարարներին։ Նա նշել էր, որ պետք է մի սեղանի շուրջ նստել, խոսել, ում հետ պետք է` բանակցել, հասկանալ` ինչպես լուծել սյունեցիների անվտանգության հարցը։
Հիշեցնենք` Սյունիքի մարզի Կապան համայնքում բնակիչները փակել են դեպի օդանավակայան տանող ճանապարհը։ Բողոքի ակցիան ուղղված է սահմանների անվտանգության խնդրին։
ՀՀ փոխվարչապետ Տիգրան Ավինյանը կառավարության այսօրվա նիստում հայտարարել էր, որ ՀՀ ՊՆ սահմանապահ զորքերը Սյունիքի սահմանների երկայնքով իրականացնում են տեղակայման աշխատանքներ։
Նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը ռազմական գործողությունների դադարեցման վերաբերյալ համատեղ հայտարարություն ընդունեցին, որի համաձայն` մի շարք տարածքներ փոխանցվեցին Ադրբեջանին։
Դեկտեմբերի 12-ին ԱԽ նիստում ՀՀ վարչապետ Նիկոլ Փաշինյանը հայտարարեց, որ առաջիկայում պետք է որոշումներ կայացվեն Սյունիքին սահմանամերձ Կուբաթլուի ու Զանգելանի շրջանների հետ կապված։ Նա չբացառեց, որ այդ գործընթացի հետևանքով կարող է որոշակի լարվածություն առաջանալ։
Սահմանը քարտեզը չէ, գրիչի ու ֆլոմաստերի գիծը չէ. Սարհատ Պետրոսյան