ԵՐԵՎԱՆ, 16 դեկտեմբերի - Sputnik. Հայստանյան բանկային համակարգում դարձյալ վարկերի վերադարձելիության խնդիր է գրանցվել։ Այս մասին այսօր լրագրողների հետ հանդիպմանն ասաց ՀՀ ԿԲ նախագահ Մարտին Գալստյանը` հավելելով, որ նման իրավիճակի պատճառը տարեսկզբից մոլեգնող կորոնավիրուսի համավարակն է ու Արցախի դեմ սեպտեմբերին սանձազերծված պատերազմը։
«Վերադարձելիության հետ կապված կարող են խնդիրներ լինել։ Մենք դա անընդհատ մեր ուշադրության կենտրոնում ենք պահում, որովհետև բանկերի հետ ամենօրյա աշխատանքային ռեժիմում ենք` իրենց ունեցած ավանդների, վարկերի, շարժերի հետ կապված։ Վերջին տվյալներով` չաշխատող վարկերի թիվը 6.7 տոկոս է։ Մեր կանխատեսումն այն է, որ այդ թիվը կարող է աճել մինչև 10 տոկոս»,– ասաց Գալստյանը։
ԿԲ նախագահն ասաց, որ մտահոգություն կա, բայց կա նաև հույս, որ ՀՀ–ում առկա կապիտալն ի վիճակի է կլանելու հնարավոր առաջացող ռիսկերը։
Նշենք, որ կանխատեսվող գնաճային ճնշումները զսպելու համար ՀՀ ԿԲ–ն այսօր կայացրել է վերաֆինանսավորման տոկոսադրույքը 1 տոկոսով ավելացնելու որոշում։