ԵՐԵՎԱՆ, 14 դեկտեմբերի – Sputnik. Հադրութի շրջանի Հին Թաղեր և Խծաբերդ գյուղերի վերահսկողությունը շարունակելու է մնալ հայկական զինուժի վերահսկողության ներքո։ Այսօր ուղիղ եթերում ժողովրդին ուղղված ուղերձում հայտարարեց ՀՀ վարչապետ Նիկոլ Փաշինյանը` ներկայացնելով Արցախում տեղի ունեցած իրադարձությունները։
«Իհարկե, Ադրբեջանի ձեռնարկած այդ գործողություններն ունեն բացահայտ սադրիչ բնույթ, բայց դրանք ուղղված են նաև Արցախում ռուս խաղաղապահների ներկայության արժեզրկմանը։ Նրանք ուզում են ցույց տալ, որ խաղաղապահներն ի վիճակի չեն կանգնեցնելու իրենց կողմից ձեռնարկվող սադրանքները, և Հին Թաղեր, Խծաբերդ հատվածի ճաատագիրը ՌԴ խաղաղապահների առաջին լուրջ փորձությունն է, մանավանդ որ Արցախի ՊԲ–ն չի կարող գործել այն նույն տրամաբանությամբ, ինչ անում են ադրբեջանցիները։ Նկատի ունեմ` հայկական կողմը չպիտի անի գործողություններ, որոնք ուղղակի կամ անուղղակի կարող են հարվածի տակ դնել խաղաղապահների առաքելության արդյունավետությունը»,– ասաց Փաշինյանը։
Հիշեցնենք` դեկտեմբերի 11-ին՝ ժամը 20:40-ի սահմանում, օգտվելով այն փաստից, որ Արցախի Հանրապետության տվյալ հատվածում խաղաղապահ ուժեր տեղակայված չեն, Ադրբեջանի զինված ուժերի հատուկջոկատային ստորաբաժանումները գրոհ էին ձեռնարկել արցախա-ադրբեջանական շփման գծի՝ Հադրութի շրջանի Հին Թաղեր և Խծաբերդ բնակավայրերի հատվածում, ինչի հետևանքով տարբեր աստիճանների հրազենային վնասվածքներ են ստացել ՊԲ վեց զինծառայողներ:
Հին Թաղերը կորցրել ենք, Խծաբերդում և՛ ադրբեջանցիներ կան, և՛ հայեր. Հադրութի շրջանի ղեկավար
Ավելի ուշ հայտնի դարձավ, որ ռուս խաղաղապահները վերահսկողության տակ են վերցրել Խծաբերդ և Հին Թաղեր գյուղերը։
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են