ԵՐԵՎԱՆ, 11 դեկտեմբերի - Sputnik. ՀՀ վարչապետ Նիկոլ Փաշինյանի հրաժարականի պահանջով ակցիա անցկացնող ցուցարարների և ոստիկանների միջև քիչ առաջ քաշքշուկ տեղի ունեցավ Երևանի Սայաթ Նովա փողոցի հատվածում։
Ոստիկանները բերման ենթարկեցին մի քանի քաղաքացիների, նրանց թվում ՀՅԴ անդամ Գեղամ Մանուկյանին և Իշխան Սաղաթելյանին։
Ոստիկաններին դժվարությամբ հաջողվեց Մանուկյանին ոստիկանական մեքենա նստեցնել։ Մինչև վերջին վայրկյանը նա վանկարկում էր «Նիկոլ, դավաճան»։
Ֆրանսիայի հրապարակում մեծ թվով ոստիկանական կուտակում է։ Նրանք պահանջում են ցուցարարներին դուրս գալ փողոցի երթևեկելի հատվածից և բերման ենթարկում մեծ թվով քաղաքացիների։ Ֆրանսիայի հրապարակում է նաև Արթուր Վանեցյանը։
Բերման ենթարկվածներ կան նաև Ֆրանսիայի հրապարակից։ Բերման ենթարկելու ժամանակ ցուցարարներից մեկի առողջական վիճակը վատացավ, նրան շտապօգնության մեքենայով տեղափոխեցին հիվանդանոց։
Նշենք, որ Երևան քաղաքի տարբեր հատվածներից մեկնարկել է քաղաքացիների «Արժանապատվության երթը»՝ Նիկոլ Փաշինյանի հրաժարականի պահանջով։ Այս պահին Բաղրամյան փողոցով երթով դեպի Ֆրանսիայի հրապարակ են շարժվում մի քանի հարյուր քաղաքացիներ։
Նրանք փորձում են շղթա կազմած առաջ գալ, որպեսզի ոստիկաններն իրենց ևս բերման չենթարկեն, ինչպես Մաշտոցի պողոտայի հատվածում արեցին։
Ցուցարարները փակել էին Մոլդովական-Թոթովենց ճանապարհը, որը տանում է դեպի ՊՆ
Հիշեցնենք, որ նոյեմբերի 9–ի եռակողմ հայտարարությունից հետո ընդդիմադիր 16 կուսակցությունենրը պահանջում են վարչապետ Փաշինյանի հրաժարականը և այդ պահանջով պարբերաբար բողոքի ակցիաներ ու երթեր են իրականացնում։