ԵՐԵՎԱՆ, 11 դեկտեմբերի - Sputnik. Ռազմական գործողությունների այն վայրերում, որոնք այժմ ադրբեջանական վերահսկողության տակ են գտնվում, որոնողական աշխատանքներին մասնակցելու թույլտվություն է տրվել նաև անհետ կորած զինծառայողների հարազատներին: Sputnik Արմենիայի հետ զրույցում տեղեկությունը հայտնեց Արցախի արտակարգ իրավիճակների պետական ծառայության հասարակայնության հետ կապերի բաժնի պետ Հունան Թադևոսյանը:
«ԱԻՊԾ տնօրեն, գեներալ–մայոր Կարեն Սարգսյանը դիմել էր ռուս խաղաղապահներին և Կարմիր խաչի միջազգային կոմիտեին, որպեսզի թույլատրեին անհետ կորածների ծնողներն էլ մասնակցեն որոնողական աշխատանքներին։ Թույլտվություն ստանալուց հետո ստեղծվեց օպերատիվ շտաբ, և այժմ յուրաքանչյուր ուղղությամբ աշխատանքներին մասնակցում են նաև որոշ քանակությամբ ծնողներ։ Նրանք իրար մեջ են որոշում` ովքեր են մասնակցելու այդ աշխատանքներին»,–ասաց Թադևոսյանը։
Նրա խոսքով` ծնողներն ավելի հստակ գիտեն իրեն տղայի տեղը, քանի որ վերջին անգամ հենց նրանց է զանգել։ Ծնողների հետ զրույցի արդյունքում քարտեզագրվում են տվյալները, և սկսվում են որոնողական աշխատանքները։
Թադևոսյանն ասաց նաև, որ այդ աշխատանքներին մասնակցելը շատ դժվար է ինչպես ծնողների, այնպես էլ փրկարարների համար, սակայն իրավիճակն այնպիսին է, որ դիակ գտնելիս անգամ ուրախանում են, որ ի վերջո այն գտնվեց։
Նա հայտնեց նաև, որ այս պահին որոնողական աշխատանքները շարունակվում են Ֆիզուլու և Ջաբրայիլի ուղղություններում: Երեկ Ջաբրայիլում գտնվել է 20 զոհված զինծառայողի մարմին, իսկ Թալիշի հատվածում՝ 1: Երեկոյան կամփոփվեն այսօրվա տվյալները։
«Նոյեմբերի 13-ից սկսած` Արտակարգ իրավիճակների պետական ծառայության փրկարարական ջոկատները մասնակցում են բուն որոնողափրկարարական աշխատանքներին։ Բոլոր ուղղություններում այդ աշխատանքները սկսել են. առաջինը սկսել ենք Շուշիից։ Նոյեմբերի 13-ից մինչև այսօր ընդհանուր առմամբ գտնվել է 802 զոհվածի աճյուն»,–ասաց Թադևոսյանը։
Գերիների վերադարձն ու դիակների փոխանակումը հրատապ լուծում է պահանջում. Հայաստանի ՄԻՊ
Նա հավելեց նաև, որ այս ընթացքում ողջ մնացածների, ցավոք, չեն գտել` բացառությամբ նոյեմբերի 14-ին Շուշիի անտառային գոտում մեկ ադրբեջանցի վիրավոր և մեկ հայ զինծառայողների։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Նոյեմբերի 9-ին ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն` ռազմական գործողությունները դադարեցվեցին։
Համացանցում լուր տարածվեց, որ հայկական կողմն ունի 4750 զոհ ու անհետ կորած։ Հայաստանի առողջապահության նախարարության դատաբժշկական ծառայությունը փորձաքննել է 2718 զոհված զինծառայողի մարմին:
Դեկտեմբերի 10-ի տվյալներով՝ Արցախի ՊԲ-ն հրապարակել է 1779 զոհվածների անունները։
Վերջին տվյալներով` քաղաքացիական անձանց շրջանում կա 50 զոհ ու 148 վիրավոր։
Անհետ կորածների, գերիների ու վիրավորների թվի մասին պաշտոնական տվյալներ չկան։
Ինչո՞ւ են ադրբեջանցիներն ուրախացել․ ռուսական խաղաղապահների հրամանատարի կենսագրությունը