ԵՐԵՎԱՆ, 10 դեկտեմբերի – Sputnik. Իրաքում բնակվող հայերն ու եզդիները համերաշխ են ազգային փոքրամասնությունների հետ կապված շատ հարցերում։ Այդ մասին Sputnik Արմենիայի թղթակցի հետ զրույցում պատմել է «Ավրորա» մարդասիրական նախաձեռնության 2019թ․ դափնեկիր, ազգությամբ եզդի, իրաքցի, Luftbrücke Irak («Օդային կամուրջ դեպի Իրաք») կազմակերպության տնօրեն Միրզա Դինային։
«Հայերն ու եզդիները միմյանց հետ համամիտ են շատ հարցերում, որոնք վերաբերում են անմիջապես ազգային փոքրամասնություններին։ Ապրիլի 24-ին մենք՝ եզդիներս, սովորաբար այցելում ենք Բաղդադի հայկական մշակութային կենտրոններ՝ հարգանքի տուրք մատուցելու 1915թ․-ի Ցեղասպանության զոհերի հիշատակին»,-ասել է Դինային։
Նշենք, որ ամեն տարի ապրիլի 24-ին Բաղդադի Սուրբ Գրիգոր Լուսավորիչ հայկական եկեղեցում պատարագ է մատուցվում Հայոց ցեղասպանության զոհերի հիշատակին։ Իրաքի մայրաքաղաքի հայկական մշակութային կենտրոններում այդ օրը նաև հիշատակի այլ միջոցառումներ են անցկացվում։
Ավելի վաղ Երևանում տեղի է ունեցել ««Ավրորա» նախաձեռնության դափնեկիրներ․ Միրզա Դինայի» նոր միջազգային փոստային նամականիշի մարման արարողությունը:
Իսկ այսօր Դինային մեկնել է Արցախ՝ տեղում ծանոթանալու պատերազմից հետո տիրող իրավիճակին։ «Ավրորայի» չորրորդ մրցանակակիրը զինված հակամարտությունների հետևանքների հաղթահարման մեծ փորձ ունի։
Հայերն Իրաքում հիմնավորվել են 7-12-րդ դարերում՝ Աբասյան խալիֆայության ժամանակ, և հայկական համայնքներ են ստեղծել Բասրայում և Բաղդադում։ Արդեն 1638թ․-ին թուրք սուլթան Մուրադ 4-րդը Բաղդադը գրավելուց հետո հայերին քաղաքում ապրելու արտոնություն է տվել։
Այն Մերձավոր Արևելքի ավանդական և բարգավաճող համայնքներից մեկն էր։ Իրաքի առաջին հայկական տպարանը հիմնադրվել է 1874թ․-ին Բաղդադում, Թադևոսյան եղբայրների կողմից։ Իրաքի հայ համայնքը աճեց հիմնականում 1915թ․-ի Ցեղասպանությունը վերապրած փախստականների հաշվին։ Ավելի ուշ նրանց մի մասը լքեց երկիրը, ոմանք էլ հայրենադարձվեցին Հայաստան։
Տարբեր գնահատականներով՝ այսօր Իրաքում մոտ 10-15 հազար հայ է բնակվում։