ԵՐԵՎԱՆ, 10 դեկտեմբերի – Sputnik. ՀՀ վարչապետ Նիկոլ Փաշինյանի հրաժարականի պահանջով այս պահին բողոքի ակցիա են իրականացնում Հանրապետության հրապարակի մոտ։
Քաղաքացիները մոտոցիկլետներով հրապարակի գորգի շուրջն են երթևեկում։
«Այս դավաճան իշխանությունը պետք է հեռանա, իսկ ոստիկանությունը ոչ թե պետք է պաշտպանի ադյ իշխանությանը, այլ ժողովրդի կողքին կանգնի»,–ասում են բողոքի ակցիայի մասնակիցները։
Դրան զուգահեռ կառավարության առջև մի խումբ պաստառներ են տեղադրվել, որոնց վրա գրված են ֆեյսբուքյան օգտատերերի անուններ` «Անհատական մերսում», «Առնեմ ծախեմ», «Նվերների աշխարհ», «Խպարտ խայուխի», ինչպես նաև մարդկանց անուններ։
«Քանի որ Փաշինյանի համակիրները ֆեյքերն են, մենք էլ որոշել ենք իր համակիրների հանրահավաք կազմակերպել։ Այստեղ են իր աջակիցները, և սա երևի ամենաանկեղծ հանրահավաքն է ի աջակցություն վարչապետի»,–ասաց ՀՀԿ երիտասարդական կազմակերպության ղեկավար Հայկ Մամիջանյանը։
Նա հայտնեց նաև, որ իրենց հանրահավաքի մասնակիցներից որոշների աշխատած ընկերություններում ստուգումներ են սկսվել, ու հանկարծ հայտնաբերվել է, որ ֆինանսական որոշ խնդիրներ կան։
Նշենք, որ բողոքի ակցիան ավարտվեց, իսկ պաստառները ցուցարարները թողեցին կառավարության առջև։
Հիշեցնենք՝ նոյեմբերի 9–ին ստորագրված եռակողմ հայտարարությունից հետո ընդդիմությունը պարբերաբար բողոքի ակցիաներ է կազմակերպում Երևանում` պահանջելով Նիկոլ Փաշինյանի հրաժարականը։ Դեկտեմբերի 3-ին հայտնի դարձավ, որ ընդդիմությունն առաջարկում է ժամանակավոր կառավարություն ստեղծել, որը կգլխավորի ՀՀ նախկին վարչապետ, Հանրային խորհդրի նախկին նախագահ Վազգեն Մանուկյանը։