ԵՐԵՎԱՆ, 9 դեկտեմբերի – Sputnik. Սիրիացի ահաբեկիչ վարձկանները ռազմագերի չեն և ենթակա չեն հանձման կամ փոխանակման: Sputnik Արմենիայի հետ զրույցում ասաց ՀՀ քննչական կոմիտեի տեղեկատվության և հասարակայնության հետ կապերի բաժնի պետ Ռիմա Եգանյանը:
Նշենք, որ տարբեր հարթակներում հարց է հնչում, թե արդյո՞ք գերիների փոխանակումը տարածվելու է նաև սիրիացի այն վարձկանների վրա, որոնց գերեվարել է հայկական կողմը։
«Սիրիացի ահաբեկիչ վարձկանները գտնվում են մեղադրյալի կարգավիճակում և կալանավորված են»,–ասաց Եգանյանը։
Ազգությամբ արաբ, Սիրիայի քաղաքացիներ Յուսեֆ Ալաբեթ Ալ Հաջին և Մուհհռաբ Մուհամմադ Ալ Շխերին մեղադրվում են ՀՀ քրեական օրենսգրքի 389-րդ հոդվածի (միջազգային ահաբեկչություն), 34-390-րդ հոդվածի 1-ին մասի 1-ին կետի, 3-րդ մասի 1-ին կետի (միջազգային մարդասիրական իրավունքի նորմերի լուրջ խախտումները զինված ընդհարումների ժամանակ) և 395-րդ հոդվածի 3-րդ մասի (վարձկանություն) հատկանիշներով:
Երկուսն էլ հարցաքննության ժամանակ փաստել են, որ Սիրիայից են և որոշակի գումարի դիմաց եկել են կռվելու Արցախի դեմ պատերազմում։
Արա Այվազյանը լը Դրիանի հետ մամուլի ասուլիսի ժամանակ խոսել է գերիներից և եկեղեցիներից
Հիշեցնենք, որ ՀՀ վարչապետ Նիկոլ Փաշինյանը դեկտեմբերի 5-ին հայտնել էր` գերիների վերադարձի հարցում համաձայնեցված է «բոլորը բոլորի հետ» սկզբունքը: Նրա խոսքով` այս սկզբունքը վերաբերվում է ոչ միայն պատերազմի ընթացքում գերեվարված, այլև պատերազմից առաջ հայկական ու ադրբեջանական կողմում մնացած անձանց: