ԵՐԵՎԱՆ, 9 դեկտեմբերի - Sputnik. ՀՀ կրթության, գիտության, մշակույթի և սպորտի նախարարությունում հրավիրված ասուլիսի ժամանակ ԿԳՄՍ նախարարի խորհրդական Սամվել Կարաբեկյանը հերքեց, որ «Բարձրագույն կրթության և գիտության մասին» օրենքի նախագիծը հատուկ ընդունվել է ճգնաժամային պահին, երբ հանրության ուշադրությունը այլ տեղերում է։
«Հակառակը` ես կասեի, որ այս օրենքը ուշացած է։ Նրա շուրջ երկար աշխատանք է տարվել։ Նման բան չկա, որ այն հապճեպ է ներկայացվել», – ասաց Կարաբեկյանը։
Նշենք, որ մի շարք բուհեր` ներառյալ Երևանի պետական համալսարանը և Երևանի պետական բժշկական համալսարանը, պահանջել էին հետ կանչել օրենքի նախագիծը` դրա որոշ կետեր անընդունելի համարելով։ Մասնավորապես` ԵՊՀ հայոց լեզվի ամբիոնը դեմ էր արտահայտվել 2021-2022 ուստարվա ընդունելության քննությունների առարկայական ցանկում «Հայոց լեզու և գրականություն» առարկան բուհերի կամ դիմորդի ընտրությանը թողնելը։ Սրան արձագանքելով` Կարաբեկյանն ասաց, որ բուհերում դասավանդման լեզուն շարունակում է մնալ հայերենը։
«Այս օրենքը հայոց լեզվի մասին չէ, այն առարկաների ընտրության ազատության մասին է, այն բուհերի ինքնավարության մասին է։ Դասավանդման լեզուն հայկական բուհերում շարունակում է մնալ հայերենը։ Եթե դուք կարծում եք, որ պետք է հայոց լեզվի մասին որոշում կայացնի ոչ թե բուհը, այլ օրենքը, գուցե այդպես բոլոր առարկաներն էլ օրենքո՞վ որոշվեն։ Ինձ համար անհասկանալի է դա։ Առարկայի մասին որոշումը կայացնում է բուհը, այն էլ` ոչ թե ընդհանուր, այլ կոնկրետ ամբիոնը, կոնկրետ ծրագրի ղեկավարը», – ասաց ԿԳՄՍ նախարարի խորհրդականը։
Բարձրագույն և հետբուհական մասնագիտական կրթության վարչության պետ Ռոբերտ Սուքիասյանն էլ ասաց, որ օրենքը ոչ թե սահմանափակելու, այլ ընդլայնելու է բուհերի ինքնավարությունը։
Բժշկական համալսարանը կոչ է անում հետ կանչել բարձրագույն կրթության մասին օրենքի նախագիծը
«Նիդեռլանդներում, Իսպանիայում ներդրված է այս մեխանիզմը։ Բուհը չորս ուղղություններով` կազմակերպչական, ֆինանսական, մարդկային ռեսուրսների և ակադեմիական ուղղություններով պետք է ինքնավար և անկախ լինի։ Այս օրենքի նախագիծը մի քանի քայլով մոտեցնելու է բուհերի լրիվ ինքնավարությանը», – ասաց Սուքիասյանը։
Նա նաև ասաց, որ օրենքի համաձայն` հնարավոր կլինի կրթաթոշակներ սահմանել ընդունելության քննություններին բարձր գնահատականներ ստացած, բայց վճարովի համակարգ անցած ուսանողների համար։
Նշենք` նախապես ասվել էր, որ ասուլիսին ներկա կլինի նաև փոխնախարար Արթուր Մարտիրոսյանը, սակայն նա բացակայում էր։
«Բարձրագույն կրթության և գիտության մասին» ՀՀ օրենքի նախագիծը, որի փոփոխության վերաբերյալ բազմաթիվ առաջարկներ են հնչել, 2020 թ. դեկտեմբերի 3-ին որպես անհետաձգելի և չզեկուցվող հարց ընդգրկվել է ՀՀ կառավարության օրակարգում և հավանության արժանացել: Օրենքի նախագիծը շուրջ մեկ տարի է` շրջանառվում է, և այն բավականին քննադատության էր արժանացել։
Հայոց լեզվին սպառնո՞ւմ է լատիներենի ճակատագիրը, կամ ինչպե՞ս պահպանել մայրենին