ԵՐԵՎԱՆ, 8 դեկտեմբերի - Sputnik. Պաշտպանության նախարարությունում հերքում են ՌԴ խաղաղապահ զորքերի հրամանատար Ռուստամ Մուրադովի հետ հանդիպման լուրերը։
«Պաշտպանության նախարարությունում նման հանդիպում նախատեսված չէ», – ասացին Sputnik Արմենիային ՊՆ–ից։
Նշենք, որ անհայտ կորած 34 զինծառայողների հարազատներ այժմ պաշտպանության նախարարության շենքի դիմաց են և սպասում են Մուրադովի գալուն։ Լրագրողների հետ զրույցում նրանք ասել են, որ նման տեղեկություն ունեն ՊՆ–ից։
«Մեզ ասացին` Ռուստամ Մուրադովը Ղարաբաղից գալիս է Հայաստան, արդեն ճանապարհին է, ամենաուշը գիշերը ժամը մեկին կլինի այստեղ, հանդիպում ունի։ Մենք էլ սպասում ենք իր գալուն, հուսանք` գոնե նա լուծում կտա մեր հարցին», – լրագրողների հետ զրույցում ասաց ծնողներից մեկը։
Մյուսի խոսքով էլ` թեկուզ մինչև լույս սպասելու են Մուրադովի գալուն։
«Մինչև մեր երեխեքի մասին պատասխան չստանանք, չենք գնալու», – ասաց մյուսը։
«Աղաչում եմ, չլացես, մամ. հերոս կմնամ». անհետ կորած զինվորի վերջին նամակը
Նշենք, որ 34 զինծառայողները ծառայել են Էջմիածնի զորամասում` մինչև Արցախ տեղափոխվելը։ Նրանց մեծ մասը Արմավիրի և Արարատի մարզերից է։
Հիշեցնենք, որ զինծառայողների հարազատները այսօր առավոտյան բողոքի ակցիա էին իրականացրել Էջմիածնի զինկոմիսարիատի մոտ, որտեղից զորակոչվել են զինծառայողները։ Օրվա ընթացքում նրանց ընդունել է ՀՀ ԶՈւ գլխավոր շտաբի պետ Օնիկ Գասպարյանը։