ԵՐԵՎԱՆ, 7 դեկտեմբերի – Sputnik. Սյունիքի փոխմարզպետ Նարեկ Բաբայանը «Արմենպրեսի» հետ զրույցում հերքել է լուրերը, թե մարզի Արավուս գյուղի հատվածում հայկական կողմը ադրբեջանական կողմին տարածքներ է զիջել:
Նշենք, որ այսօր ԶԼՄ–ներում տեղեկություն տարածվեց, որ Սյունիքի մարզի Արավուս գյուղի տարածքից հայկական կողմը պարտադրված է եղել 800 մետր նահանջել։
Նշվում էր, որ ադրբեջանցի զինվորականները GPS համակարգով սահմանները գծելիս Սյունիքի Արավուս գյուղից պահանջել են 800 մետր նահանջել: Գյուղապետ Արգամ Հովսեփյանը փորձել է բանակցել ադրբեջանցիների հետ և լուծել խնդիրը, սակայն վերջինիս սպառնացել են՝ «հետ չգնաք, անօդաչու սարքերով վառելու ենք»։
«Դեկտեմբերի 6-ին կորպուսի հրամանատարի հետ միասին հանդիպել են ադրբեջանական կողմին և քննարկել բնագծերը: Դրանք որոշակի հետ են բերվել, սակայն Լաչինի վարչական տարածքում: Սյունիքի վարչական տարածքից և Հայաստանի պետական սահմանից անգամ 1 մետր հող չի զիջվել»,- նշել է Բաբայանը:
Նրա խոսքով՝ Արավուսի ինքնապաշտպանական ջոկատը Լաչինի վարչական տարածքից հետ է եկել դեպի ՀՀ պետական սահման:
Նշենք, որ եռակողմ հայտարարության ստորագրումից հետո սահմանազատման աշխատանքները դեռ շարունակվում են։
Հիշեցնենք` Սյունիքի մարզի համայնքների ղեկավարներն ու ավագանու անդամները դեկտեմբերի 5–ին հանդես էին եկել կոչով՝ պահանջելով վարչապետի և կառավարության հրաժարականը:
Նրանք նշել էին, որ Սյունիքի համար ճակատագրական այս օրերին բազմաթիվ հարցեր շարունակում են մնալ անպատասխան և չլուծված։ Սահմանի հետ կապված մի շարք հարցեր վիճելի են, Սյունիքի փրկության համար վճռորոշ այս փուլում, երբ պետք է ճակատագրական որոշումներ կայացվեն, համայնքներն են շարունակում մնալ անվտանգությունը երաշխավորող հիմնական դերակատարները։
Սյունիքի մարզի համայնքների ղեկավարներն ու ավագանու անդամները նշել էին, որ նույնիսկ ամենափոքր թվացող հարցերը չեն լուծվում պետական մակարդակում, քանի որ կառավարման ամբողջ համակարգն այս օրերին անգործության է մատնված։ Թշնամին հասել է Սյունիքի դարպասներին։
Ադրբեջանական GPS-ը Սյունիքի սահմաններին էլ հասավ. Կապանի օդանավակայանը ՀՀ-ին կմնա