Վանաձորի պետական համալսարանի դասախոս, բանասիրական գիտությունների թեկնածու, դոցենտ Դավիթ Գյուլզադյանը վրդովված է կառավարության հերթական՝ բուհական ընդունելության քննությունների ցանկում հայոց լեզվի քննությունը ոչ պարտադիր սահմանելու որոշումից: Ասում է՝ հողերը հանձնեցինք, հիմա էլ կառավարության թեթև ձեռքով ազգային արժեքներն ենք ոտնակոխ անում:
«Այսպես մենք դժոխք ենք գնում, հողը տվեցինք, հիմա էլ ոգին ենք տալիս: Չկա պետական լեզու, արհամարհված է պետական լեզուն, նշանակում է՝ կեղծ պետություն ես, ինչպիսին որ մենք ենք հիմա»,- Sputnik Արմենիայի հետ զրույցում նշեց նա:
Սահմանադրությամբ է ամրագրված, որ հայերենը մեր երկրի պետական լեզուն է, և, ըստ Գյուլզադյանի, դա էլ բավարար է, որ որևէ մեկը չհանդգնի պետական լեզվի նկատմամբ այդպիսի ոտնձգություն թույլ տալ, մինչդեռ ազգային արժեքների պահպանման խոստումներով իշխանության եկած իմքայլականները հիմա ճիշտ հակառակն են անում, կայացնում են մեկը մյուսից ապազգային որոշումներ: Հիշում է՝ արդեն նախկին նախարար Արայիկ Հարությունյանը ինչպես էր փորձում արդարանալ այդօրինակ մի որոշում կայացնելուց հետո:
«Սկզբում մի հակաօրինական որոշում կայացրին, երբ բուհերում հայերենի պարտադիր ուսուցման կարգը վերացրին, արդեն նախկին նախարարը պատճառաբանում էր, որ անկախ դիմորդի ընտրած մասնագիտությունից` բուհ ընդունվելու համար հայերենի ընդունելության քննությունը պարտադիր մրցութային է լինելու»,- ասաց լեզվաբանը:
Հակապետական և ազգային արժանապատվությանն դեմ ուղղված այս որոշումներում Գյուլզադյանը միտում է տեսնում: Ավելին՝ կարծում է, որ գործող կառավարությունն ընդդեմ մայրենիի ծրագրված արշավ է իրականացնում:
«Լավ էլ գիտակցված են անում, նշանակում է՝ ինչ-ինչ օտարերկրյա կազմակերպությունների ինչ խոստումներ են տվել, հիմա պիտի մենք հատուցենք»,- ընդգծեց բանասիրական գիտությունների թեկնածուն:
Մասնագետն իր և իր գործընկերների անունից վստահեցնում է՝ եթե կառավարությունն այս որոշումը չչեղարկի, միայն հայտարարություններով ու հարցազրույցներով չեն սահմանափակվի: Դասադուլներ, գործադուլներ, սահմանադրությամբ թույլատրվող քաղաքացիական անհնազանդության բոլոր հնարավոր միջոցներով կպայքարեն, մինչև արդյունքի հասնեն: Իսկ մինչ այդ դեկտեմբերի 7-ին Վանաձորի պետական համալսարանում նիստ կգումարեն և հայտարարության տեքստ կհրապարակեն:
Նշենք, որ ԵՊՀ հայոց լեզվի ամբիոնն այդպիսի մի հայտարարություն արդեն իսկ հրապարակել է, հայտարարությանը միացել է նաև ՀՀ ԳԱԱ Հ. Աճառյանի անվան լեզվի ինստիտուտի տնօրեն Վիկտոր Կատվալյանը:
Հիշեցնենք՝ ՀՀ կառավարության` 2020 թ. նոյեմբերի 26-ի նիստում հաստատվեց 2020-21 ուստարվա բուհական ընդունելության առարկայական ցանկը: Բուհերի գերակշիռ մասը ընդունելության քննությունների ցանկում այլընտրանքային, այսինքն` ոչ պարտադիր է սահմանել հայոց լեզվի քննությունը: Ընդ որում, մայրենին այլընտրանքային է հաստատվել որևէ օտար լեզվի հետ զուգակցվելով: Ավելին, այն ոչ մրցութային է համարվել ԵՊՀ լեզվաբանական` ռուս բանասիրության, եվրոպական լեզուների և հաղորդակցության ֆակուլտետներում: