ԵՐԵՎԱՆ, 3 դեկտեմբերի – Sputnik. Արագածոտնի մարզի Թալին և Դաշտադեմ համայնքների վարչական տարածքներում կկառուցվի 200 ՄՎտ հզորությամբ արևային ֆոտովոլտային «Այգ- 1» կայան:
Տեղեկությունն այսօր ՀՀ կառավարության նիստում հայտնեց ՀՀ տարածքային կառավարման ու ենթակառուցվածքների նախարար Սուրեն Պապիկյանը՝ նշելով, որ կայանի կառուցման նպատակով ՀՀ կառավարությունն առաջիկայում մրցույթ կհայտարարի:
«Ծրագրի շրջանակում անցկացված նախաորակավորման ընթացակարգի արդյունքում հաստատվել է նախաորակավորված մասնակիցների ցանկը` Hidro China Corporation, «Գազպրոմ» էներգահոլդինգ ՍՊԸ, Abu Dhabi Future Energy Company»,- ասաց Պապիկյանը:
Նախագծի հաստատումից առաջ ՀՀ փոխվարչապետ Տիգրան Ավինյանը հայտնեց, որ նախատեսվում է մրցույթն ամփոփել 2021 թ.-ի փետրվար ամսվա ընթացքում:
«Այդժամ արդեն կունենանք վերջնական հաղթողին»,- ասաց Ավինյանը:
ԱԺ–ն գործուղումների գումար չունի. կառավարությունը պահուստային ֆոնդից փող հատկացրեց
Հիշեցնենք՝ արևային ֆոտովոլտային «Այգ- 1» կայանի կառուցման ծրագիրը ՀՀ կառավարությունը հաստատել էր մայիսի 21-ի նիստում՝ հիմք ընդունելով «Մասդար Արմենիա» ընկերության ներդրումային ծրագիրը: Ըստ այդ որոշման, մրցույթում հաղթող կճանաչվի այն ընկերությունը, որն առավել ցածր գնային առաջարկ կներկայացնի: